300 kilong isda gidagsa sa Carcar

CEBU, Philippines - Napalgan ang usa ka higanteng isda sa kadagatan sa barangay Tuyon syudad sa Carcar kagahapon sa buntag.

Sa report sa ABS-CBN Central Visayas, giingong ang maong isda gikatawag nga Sun Fish nga gibana-banang 300 kilos ang gibug-aton ug may gidak-ong 3ft ang gilapdon ug 6 ft ang gitas-on gikan sa ulo hangtud sa ikog ug gibana-bana usab nga nagpangidaron og 10-anyos ang maong isda.

Nasayran nga ang duha ka mangingisda ang nakakaplag sa maong isda ug ilaha kining gidala sa baybayon sa pagtuong usa kini ka lumod, matud pa buhi pa kini dihang ilang nakit-an apan namatay ra dayon.

Ang mga sakop sa Provincial Anti-Illegal Fishing Task Force misusi sa ginhawaan sa maong isda ug nakit-ang luspad ang atay niini ug may samad sa tinai.

Wala na itugot pang kan-on ang maong isda ug gipalubong nalang kini dayon. (BANATNEWS)