Lider sa Crips gitumba

CEBU, Philippines - Patay ang gitumbok nga lider sa Crips Gang human gipusil sa ulo sa makadaghang higayon sa nagtaptap sa nawong nga mamumuno alas-8 pasado ang takna sa miaging gabii sa sitio Kalubihan, barangay Pajac sa dakbayan sa Lapulapu.

Ang namatay mao si Elwen Custoya, 24, nagtrabaho isip mason helper sa usa ka construction firm ug giilang presidente sa maong gang sa maong lugar.

Si PO2 John Carlo Jocotan sa Homicide Section sa kapolisan sa maong dakbayan nga nahinabi sa Banat News miingon nga paingon sa pagpalit og barbeque sa maong dapit ang biktima dihang usa ka wala mailhing lalaki ang milipot sa luyo sa biktima ug gipusil kini lima ka higayon.

Naigo sa makatulo ang tuong bahin sa nawong sa biktima ug duha usab sa walang bahin sa iyang nawong nga maoy hinungdan nga namatay kini diha-diha dayon.

Matud pa ni PO2 Jocotan nga gikaengkuwentro sa biktima ang karibal nga grupong Bloods Gang sa maong lugar dili palang dugay ug usa sa mga miyembro sa Bloods ang misuway og dunggab sa biktima apan nakulatahan kini sa naulahi.

Dugang pa niya nga nag-abot na sa barangay kapitan ang kaso nila ni Custoya batok sa mga sakop sa Bloods Gang. Ang panagbangi sa duha ka grupo mao karoy gitutukan sa kapolisan nga posibleng motibo sa krimen.

Nakuha sa dapit nahitaboan ang lima ka basiyo sa kalibre .45 nga bala nga posibleng maoy gigamit sa mamumuno. (EIM) (BANATNEWS)