Mananga 2 pabutanga'g outpost

CEBU, Philippines - Ang konseho sa dakbayan sa Talisay miawhag sa kagamhanan sa siyudad sa pagpatukod og police outpost sa sitio Mananga 2 , barangay Tabunok aron mahunong na ang mga insidente sa tulis sa maong dapit.

Giaprobahan na sa konseho sa siyudad ang maong resolusyon nga gipangamahanan ni Konsehal Val Ylanan.

Sumala sa maong resolusyon, sa sitio Mananga 2 dili na maihap ang mga insidente sa tulis sukad sa milabay’ng tuig ug hangtud karon.

 Ang labing bag-o nga hitabo sa maong lugar mao ang pagpusil patay kang PO1 William Mangubat Jr. pinaagi sa tulisang iyang gigukod.

Sa maong resolusyon naghisgot sa sitio Mananga 2 nga gitawag usab og sitio “Kawatan” kay giingon kining lublobanan ug daganan sa mga tulisan.

Sa laing bahin, si Konsehal Danny Caballero kinsa kaalyado ni Ylanan nga oposisyon nagkanayon nga nagkinahanglan gyud og police visibility diha sa lugar aron ang mga badlongon magpanagana sa pagbuhat og illegal nga kalihukan.

Matud ni Caballero nga ang siyudad makaabot sa pagpatukod sa nahisgutang proyekto ug nanghinaot sila nga gahinan kini og pundo alang sa kaayohan sa tanan.

Samtang ang kapitan sa barangay Tabunok nga si Manuel Cabriana mibutyag nga ang siyudad adunay gigahing P200,000 alang sa maong proyekto.

Ang planong pagpatukod og outpost diha sa Mananga duha na ka tuig nga gihimo apan hangtud karon wala pa gyud kini matuman. (WC) (BANATNEWS)