Lapulapu nangayo'g dugang polis

CEBU, Philippines - Ang kagamhanan sa dakbayan sa Lapulapu nangayo og dugang polis sa Police Regional Office (PRO)7 aron ipuno sa kasamtangang puwersa sa kapolisan sa maong dakbayan.

Matud pa konsehal Leo Mercado sa dakbayan sa Lapulapu nga ang nagtubo nga gidaghanon sa mga molupyo sa Lapulapu angayang duyogan   usab sa tukmang gidaghanon sa kapolisan nga mobantay sa kalinaw ug kahusay sa maong dapit.

Kini tungod kay samtang misaka ang populasyon sa Lapulapu, misaka usab ang krimen sa maong dakbayan, matud pa ni Mercado.

Sayo niini gipasalig ni Mayor Paz Radaza nga hatagan niya og dugang ayuda ang kapolisan sa dakbayan ilabi na kun madugangan ang ihap sa mga polis niini.

Gitataw ni Radaza nga naglakip sa mga ayuda nga iyang ikahatag ngadto sa kapolisan mao ang dugang kahimanan sama sa sakyanan ug mga armas nga ilang magamit sa ilang pagpatunhay sa kalinaw ug kahusay sa dakbayan. - BANAT NEWS