Idlas nga drug pusher natiklo

CEBU, Philippines - Usa ka idlas nga drug pusher nasikop sa kapolisan pinaagi sa buy bust didto sa Barangay Mantuyong, dakbayan sa Mandaue sa milabay’ng hapon.

Ang nasikop mao si Reymar Pianar, 26, ulitawo , nga taga Mantuyong , usa ka inilang tigpayuhot og illegal nga drugas sa maong dapit.

Ang buy bust operation gipangulohan ni P/SInsp. Franco Rodolf Sanoria Oriol ug nasakmit gikan sa suspetsado ang duha ka gagmay’ng pakete sa gituhoang shabu, mga kagamitan sa pagsuyop, ug P200 nga buy bust money.    

Matud ni SInsp. Sanoria nga kadaghan na sila mopahigayon og buy bust operation batok kang Pianar apan idlas kaayo kini og pirme lang makaikyas.

Hinuon ning higayona ang iyang kaidlas nasanta gyud kay nagpahayahay naman siya sa prisohan. (Bong Soriano) (BANAT)