CEBU, Philippines - Personal nga miduol sa buhatan ni Gob. Gwendolyn Garcia ang tag -iya sa Ceres Bus Liner nga sila Ricardo Yanson ug ang asawa niini nga si Olivia Yanson di palang dugay aron klaruhon ang pipila ka mga isyu nga gipagawas sa pipila ka mga operators sa bus dinhi sa probinsiya sa Sugbo batok kanila. Ang magtiayong Yanson miingon nga dili angayang tuhuan ang mga pasangil sama sa pagpangolekta og mas ubos nga pletihan aron ang Ceres Bus lamang ang sakyan sa mga pasahero.
Matud pa sa duha nga nagpadayon ang pagdungog sa maong reklamo diha sa Land Transportation Franchising and Regulatory Board-7(LTFRB-7).
Ilang gipasabot nga ang ilang pagduol sa gobernadora mao ang pagsiguro nga dili mahanaw ang pagsalig sa kagamhanan sa lalawigan sa ilang kompanya nga posibleng makaapektar sa pagsulod sa daghan nilang mga buses sa Cebu South Bus Terminal, tungod lamang sa negatibong mga estorya batok kanila.
Hinuon ang gobernadora miklaro nga dili mawagtang ang pagsalig sa kagamhanan sa lalawigan sa Sugbo sa maong bus company sama sa iyang gihimo ngadto sa ubang mga bus operators bisan pa man sa pagtumaw sa pipila ka mga isyu. (Chester Abadilla/EIM) (BANAT)