Takas sa Talisay mabulokon

CEBU, Philippines - Bisan sa bunok sa uwan kagahapon wala kini makapugong sa mga tawo nga misaksi sa re-enactment sa kasaulogan sa ika-66th ka tuig nga “Takas sa Talisay Kagawasan sa Sugbo” sa dakbayan sa Talisay.

Kompara sa milabay’ng mga tuig nga reenactment sa kasaulogan sa landing sa Talisay kagahapon maoy labing maanindot ug daghan ang nakadayeg.

Kagahapon aduna gyuy ‘gubat’ tali sa mga tropang Amerikano nga gipapelan sa mga Marine Reservists ug sa mga sundalong Japanese Imperial Army nga gipapelan usab sa mga tinun-an sa Talisay City College.

Gipakita sa maong reenactment ang mga pagpangabusong gibuhat sa mga sundalong Hapon ngadto sa mga Filipinong sibilyan sa wala pa moabot ang mga Amerikano.

Kagahapon dunay duha ka mga MG 520 attack helicopter sa Philippine Air Force nga kunohay namomba. Ang mga tibuok palabas gihamok sa mga dagkong buto sa mga ‘bomba’ ug buto sa mga armas sa duha ka habig.

Human sa reenactment migawas dayon ang UH-1H helicopter nga misabwag og mga buwak diha sa lugar.

Si First District Rep. Eduardo Gullas nga maoy keynote speaker sa maong selebrasyon subling miyukbo sa kabayanihon sa mga sundalong Filipino nga mibuhis sa ilang kinabuhi kaniadto.

Atol sa selebrasyon ang Amerika girepresentahan ni Consul John Domingo ug ang Japan girepresentar ni Capt. Takeshi Ishida ang duha maoy mipasaka sa ilang mga bandila dungan sa pagpasaka usab ni Gullas ug Talisay City Mayor   Socrates Fernandez sa Bandila sa Pilipinas.

Gihagit ni Gullas ang mga kawani sa gobiyerno sa paghatag sa ilang tiunay nga serbisyo ngadto sa publiko susama sa gipakitang pag-alagad sa mga beterano panahon sa gubat.(EIM)  (BANAT)