Sen. Lacson miabot sa Sugbu kagahapon gikan nagtago

CEBU, Philippines - Human sa kapin usa ka tuig nga pagtago-tago, nasigpatan sa Mactan International Airport (MCIA) sa Cebu si Senator Panfilo Lacson pasado alas -11 sa buntag kagahapon.

Sa report sa ANC News nasayran nga ang senador naabot sa MCIA sakay sa Cathay Pacific flight number CX921 gikan sa Hongkong.

Sa diha nga nasigpatan si Lacson sa MCIA giingong gikustodiya usa kini sa Bureau of Immigration and Deportation.

Apan walay bisan usa ka sakop sa lokal nga media ang gitugotang makasulod sa maong buhatan kagahapon aron unta maka-interbyu ang senador, giingong molarga si Lacson kagabii padulong sa Manila. Sumala pa sa report nga gikatakdang mopatawag og press conference si Lacson ugmang adlawa didto na sa Manila.

Sa pakighinabi sa ANC News ni PNP Spokesman Chief Supt. Agrimero Cruz, mikompirmar kini nga naabot si Sen. Lacson sa MCIA alas 11:42 sa buntag diin gitagbo kini ni Danilo Almeda ang division chief sa BID.

Si Lacson adunay warrant of arrest sa kasong murder kabahin sa Dacer-Corbito murder case apan ang Court of Appeals mipawalay-bili sa maong warrant of arrest niadtong Marso 18 nga nag-reaffirm sa desisyon nga migawas niadtong Pebrero 3.

Ang desisyon niadtong Pebrero 3 nag-dismiss usab sa double-murder case ni Lacson ug ang Korte Suprema ray makapabalik sa warrant of arrest.

Kahinumduman nga niadtong Enero 5 sa miaging tuig kalit lang nga nahanaw si Lacson sa nasud duha ka adlaw sa wala pa siya malakip sa gipasakaan og kasong double murder human kini gipasanginlang adunay kalabotan sa pagpatay sa publicist nga si Salvador “Bobby” Dacer ug sa driver niini nga si Emanuel Corbito niadtong Nobiyembre 2000.

Si Lacson gitumbok sa duha niini ka mga opisyal sa kapolisan nga iyang kanhi sakop sa gibungkag na nga Presidential Anti Organized Crime Task Force (PAOCTF) nga may kalambigitan sa kamatayon sa duha.

Si Lacson hugtanong mihimakak sa mga alegasyon sa iyang kanhi mga sakop.

Samtang ang abogado ni Cesar Mancao, usa sa mga opisyales nga miduot kang Lacson, nga si Atty. Ferdinand Topacio sa samang report mibutyag nga dako ang ilang kalipay nga ang PNP mipahibalong ilang panid-an ang kalihukan ni Lacson karong miabot na kini dinhi sa nasud.

“We have presumed Lacson will surface after Court of Appeals removed any legal impediments to restrict his movement. I wish Lacson should respect all aspects of the law. I’m so glad also that PNP will be closely monitoring Sen. Lacson,” pasabot pa ni Topacio sa maong phone interview sa ANC.

Sa gipadala nga text message sa ANC News sa legal counsel ni Sen. Lacson mibutyag kini nga “I say that having foisted on the courts Mancao’s incredible affidavits, he is the last person who can lecture Senator Lacson on the need to respect legal process.” (Lesley Caminade-Vestil/EIM) (BANAT)