Linog sa Myanmar 63 ka tawo patay

CEBU, Philippines - Usa ka kusog nga linog ang miigo sa nasud sa Myanmar ug mikalas og 63 na ka tawo sumala pa sa report sa state media sa maong nasud kagahapon ug gitay-og usab og nagsunod-sunod nga aftershocks nga nagbunga og kalisang sa mga molupyo sa mga silingang nasud niini gikan sa Thailand hangtud sa Laos.

Ang linog nga may gikusgong 6.8 magnitude gituohang mas kusog pa gyud kun didto gisukod sa Myanmar sanglit kapin sa 100 ka buildings ang nangalup-og. Samtang kapin sa 100 ka tawo ang nangaangol sumala pa sa ilang state-controlled media sumala pa sa report sa GMA News.Tv.

Bisan hinuon mimugna og grabeng panic sa mga silingang nasud ang maong linog wala kini makamugna og danyos.

Ang maong linog subling mipukaw sa kahadlok sa publiko tungod sa bag-ohay lang nga nahitabong linog sa Japan nga gisundan og tsunami nga diin miabot na sa kapin 10 mil ang nakalas.

Samtang ang mga nasud sa kabaybayunan sa Indian Ocean sama sa Thailand, Indonesia ug uban pa wala pa makalimot sa miigong tsunami niadtong 2004 nga mikalas og 226,000 ka tawo.

Sa nasud sa Thailand, nabati ang 5.5 magnitude pagtay-og sa yuta ug gimando dayon ngadto sa mga residenteng duol sa epicenter sa linog ang pagpabalhin kanila.

Ang maong linog giingong nahitabo 6.2 milya kon 10 ka kilometro sa ilawom sa yuta apan wala kaayo makadaot sa habig sa Thailand. Ang mga utlanan sa Thailan, Myanmar ug Laos nag-abot diha sa pamosong "Golden Triangle" region.

Ang lungsod sa Tachilek sa Myanmar maoy usa sa nagrabehan maong namakwit ang mga residente human mangliki ang mga yuta. Ang Red Cross miingon nga ang mismong tambalanan sa maong lungsod miliki . (BANAT NEWS)