Polis naunay tipi

CEBU, Philippines - Patay ang usa ka pulis human gituohang naunay sa iyang kaugalingong service firearm sa dihang iyang giduwaan ug gi-cock pagmatuod nga walay sulod nga bala samtang nakig-inom sa iyang mga higalang tanod sa miaging alas-8 pasado sa gabii diha sa Purok 4 sa barangay Kamputhaw ning siyudad.

Si PO2 Gonzalo Matondo Jr., 37, nagpuyo diha sa Andres Abellana sa barangay Guadalupe ug sakop sa Cebu City Public Safety Company (CCPSC) kanhi Service Security Group (SSG) sa Cebu City Police Office.

Sila si Milford Pinatil ,37, tanod, ug Asuncion Fontanasa mga residente sa Gadiongco compound ug Tacio Bordomeo nga tanod gihapon mao nay mipahibalo sa kapolisan.

Subay sa pasiunang pakisusi nila ni SPO4 Alex Dacua, PO2 Jodan Batucan, PO2 Dario Manatad, ug PO2 Michael Codaste sa Homicide Section ug Crime Scene Investigation Unit (CSIU) sa Cebu City Police Office (CCPO) ilang naabtan ang biktima nga nagbuy-od ug patay na diha sa compound nga dunay samad pinusilan sa walang bahin sa iyang dughan.

Nakuhang mga ebidensya sa crime scene mao ang usa ka 9mm (Pietro Berreta), holster color itom, usa ka plastic magazine, usa ka empty shell sa .9mm, tulo ka buhing bala sa cal. 9mm, tulo ka empty shells sa .38 special ug usa ka posas.

Sa imbestigasyon sa kapulisan, ang biktima nga off-duty mibisita diha sa nahisgutang lugar sa iyang mga higalang sila si Pinatil ug Bordomeo ug nag-inom.

Sa tanto nilang inom ang biktima giingong kalit mibunot sa iyang service firearm ug nangomedya sa makadaghang higayon pinaagi sa pagkasa-kasa sa iyang armas ug miingon: ‘wala ni bala’ apan kalit lang mibuto ang maong armas.

Ang biktima naigo sa wala niyang dughan nga miresulta sa iyang pagkamatay diha dayon, wala hinuon madetalye sa mga tanod kung giunsa pagkahitaboang napunta sa dughan sa biktima ang sumbohan sa armas nga gikuptan niini.

Gisuwayan pa unta pagtabang ang biktima sa mga sakop sa Emergency Rescue Unit Foundation (ERUF) apan ‘zero-zero’ vital sign na kini.

Si Jeffrey Tumulak, kagawad sa nahisgutang lugar kinsa suod nga higala sa namatay mibisita kagahapon sa St. Francis Funeral Homes diin kini gihaya nga nahinabi sa mga tigbalita nagkanayon nga mihimo siya’g kaugalingon nga pakisusi human sa hitabo.

Matud ni Tumulak nga gitagsa-tagsa niya sa pagpangutana ang duha nila ka tanod nga sila si Pinatil ug Bordomeo aron pagsuta sa iyang nakuhang impormasyon kalabot sa maong hitabo ug pagwagtang usab sa pagduda nga napusilan ang biktima ug wala maunay sa iyang service firearm.

“Sila maoy nagkuyog og inom (Bordomeo ug Pinatil) pero napakgang ilang inom tungod sa uwan. Ila kunong gibadlong si Matondo (pulis) ayaw duwa-i ang armas niingon man nga wala ni bala, to prove nga way bala iyang gition-tion kalit man na mibuto,” matud pang Tumulak.

Matud ni Tumulak nga sa unang nakita aksidente ang nahitabo apan kinahanglan pang palawman og maayo sa kapulisan ang ilahang imbestigasyon.

Aron pagwagtang sa pagduda ilahang gipailawom sa paraffin test sila si Bordomeo ug Pinatil ingon man ang biktima.

Si Dr. Nestor Satur, ang medico legal sa PNP Crime Laboratory nga maoy mi-awtopsiya sa patay’ng lawas sa biktima miingon nga dul-it ang pagkaigo niini sanglit duna kini paso sa iyang dughan.

Si Matondo dunay duha ka anak ug ang kamagulangan lalaki ug ikaduha babaye diin nagpangidaron 8-anyos ug 6-anyos. (BANAT NEWS)