P1M nga 'endangered marine species' sakmit

CEBU, Philippines - Mokabat sa usa ka milyon ka pesos nga kantidad sa mga ‘endangered’ sea shells gikan sa usa ka shell craft factory nga nahimutang diha sa barangay Bakilid dakbayan sa Mandaue ang nasakmit atol sa gihimong operasyon sa Criminal Investigation and Detection Group (CIDG)-7 kagahapon sa udto.

Ang CIDG dala ang search warrant nga giisyu ni Judge Simeon Dumdum, Jr. sa Regional Trial Court Branch 8, mironda sulod sa compound sa Perlac Trading Corporation nga nahimutang sa Sacris-Road, A.S Fortuna St., sa nahisgutang barangay.

Ang operasyon sa CIDG gumikan sa programa sa provincial government nga Oplan Kalikasan program nga giabagan sa Bureau of Fish and Aquatic Resources-7 matud pang Sr. Insp. Ricky Neron ang team lider sa CIDG

Lakip sa miabag sa operasyon ang Provincial Environment and Natural Resources Office (PENRO).

Napakyas ang mga awtoridad pagsikop sa operator sa shell craft factory nga subject sa SW nga sila si Maria Janice Roldan ug Rudy del Valles kinsa atua sa kaulohan.

Sumala pang Neron, ang nagkalain-laing klase sa seashells nga gihimo sa shell crafts, materyales sa handicrafts, jewelry ug fashion pang-export.

Si Nathaniel Lucero, BFAR-7 Aquaculturist II, nagkanayon nga usa sa mga endangered specie nga nakumpiskar mao ang ‘budyong’ kon trumpet shells, kini naa sa listahan sa BFAR’s nga Protected Philippine Aquatic Wildlife.

Matud ni Lucero ang tag-iya o operator sa maong factory mag-atubang og sumbong nga kalapasan sa Fisheries Administrative Order 158 ug Section 97 sa Republic Act 8850 or the Phil. Fisheries Code of 1998.

Si Neron midugang nga ilang gi-surveillance ang maong pabrika sulod na sa kapin usa ka buwan human sila makadawat og report gikan sa concerned citizen nga nag-export kini og endangered sea shells.

Matud pang Neron ilang pasakaan og kaso ang mga suspetsado kinsa nag-operate na sulod sa kinse ka tuig. (/EIM) (BANATNEWS)