CEBU, Philippines - Mimando na si Cebu Customs District Collector Atty. Ronnie Silvestre sa pag-monitor sa mga produktong gikan sa nasud sa Japan nga miabot dinhi sa Sugbu.
Kini nunot sa nahitabong pag-ulbo sa usa ka nuclear plants sa Fukushima nasud sa Japan atol sa nahitabong linog ug tsunami niadtong Marso 11 ning bulana ug miresulta sa radiation leaks. Pipila sa mga pananom, dairy products ug gatas gikan sa Japan ang giingong nakontaminado sa radiation.
Ang nasud sa Pilipinas usa sa mga moimport og mga produkto gikan sa maong nasud ilabi na sa mga nag-negosyo dinhi og Japanese restaurants ug electronic parts.
Apan ang maong kamanduan magsentro kini sa pagmonitor sa mga produktong pagkaon ug mga karne nga gikan sa Japan ug kini may koordinasyon gikan sa Bureau of Food and Drugs (BFAD) ug Department of Health.
Gawas sa pagkaon ilaha usab gi-monitor ang temperatura sa lawas sa mga tawong gikan sa Japan, hinuon ang mga eksperto nagkanayon nga sa dili grabeng radiation contamination sa tawo mahimo lang kining makuha pinaagi sa pagkaligo ug paghugas. Gihangyo ni Silvestre ang katawhan nga mokooperar ngadto kanila pinaagi sa paghatag og impormasyon ngadto kanila sa mga buot mopalusot og mga produkto gikan sa nasud sa Japan. (BANATNEWS)