Notorious nga mangunguot tiklo

CEBU, Philippines - Nadakpan sa kapolisan ang usa ka giilang ‘notorious’ nga mangunguot human biktimaha niini ang   usa ka babaye nga iyang kasakay sa PUJ sa dalan Gorordo Avenue sa barangay Kamputhaw, ning siyudad sa Sugbo kagahapon sa alas-11:00 pasado sa buntag.

Si Otto Otero, 30, nadakpan dayon human ang iyang biktima nga si Ella Lisa Montilla, 37, daling nakapangayo og tabang sa kapolisan sa Cebu City Police Office (CCPO) kansang buhatan dili kaayo layo sa nahitaboan.

Ang biktima uban sa iyang anak babaye nga misakay sa PUJ nga 13-C gikan sa ilang pinuy-anan sa San Roque Village sa barangay Talamban, paingong naghatod sa iyang manghod sa usa ka tulunghaan duol sa CCPO sa dihang gikuotan siya.

Si SPO2 Jeffrey Diola sa Theft and Robbery Section (TRS) sa CCPO misaysay subay sa giasoy sa biktima nga nabantayan sa naulahi ang iyang pitaka nga kalit nga nahanaw sulod sa iyang shoulder bag.

Tungod niini nagduda dayon ang biktima sa iyang tapad nga lalaki kinsa nailhan nga si Otero nga maoy mikuot sa iyang pitaka.

“Kay sa sulod sa jeep, sige man daw dutdot tong laki niya. Mao nga nalipat usab siya kay ang iyang focus didto man sa iyang anak,” matud pang Diola kinsa midugang nga puno sa pasahero ang PUJ.

Human niini gitaho dayon ni Montilla sa Mobile Patrol Group car 016 nga mao pay paggawas sa kampo milabay sa iyang gibarogan.

Human gipahibawo sa biktima ang iyang gidangatan, si SPO1 Jomar Tagalog miduol sa drayber sa PUJ kinsa niadtong tungora mihunong tungod kay stop ang signal.

Ang biktima mitudlo dayon ni Otero kinsa nagdala og bag niadtong tungora nga maoy iyang gidudahang nagkuot sa iyang pitaka nga dunay sulod nga P8,900 ug $5 dolyares . Dihadiha giutingkay dayon ni Tagalog ang bag ni Otero ug didto nakita ang pitaka sa biktima hinungdan nga gisikop dayon sa mga otoridad si Otero.  - BANAT NEWS