Alcover nganong "No" sa impeachment

CEBU, Philippines - Gipasanginlan ang Malacañang nga maoy utok nga nag-impluwensiya sa mayoriya sa mga kongresista pagbotar pabor sa pagpa-impeach kang Ombudsman Mercidetas Gutierrez atol sa milabay’ng botasyon sa kongreso.

Mao kini ang walay lipod lipod nga pamahayag ni Alliance of Nationalism and Democracy (ANAD) Partylist Representative Pastor “Jun” Alcover atol sa interview sa Bantay Radyo.

Gitug-an ni Alcover nga pipila ka adlaw sa wala pa itakda ang botasyon sa kongreso sa pagduso sa impeachment didto sa Senado, gipatawag sila sa Political Adviser ni Presidente Benigno “Noynoy” Aquino III nga si Ronald Biaras sa pagtambong sa usa ka meeting didto sa Malacañang apan wala siya motambong niini.

Dugang ni Alcover nga atol sa maong meeting gipasaligan ang mga mitambong nga kongresista nga i-release dayon ang ilang tagsa tagsa ka pork barrel basta mobotar sila pabor sa pag-impeach kang Gutierrez ug aduna pay dugang P20 milyones nga pakapin alang sa mga proyekto niini matag distrito.

Kini maoy gituohan ni Alcover nga naka-pressure busa miabot gyud og kapin 200 ka kaubanan niya sa kongreso ang mibotar pabor sa impeachment.

Si Alcover nga usa sa upat ka Sugbuanong kongresista nga mibotar og No sa impeachment ni Gutierrez mipasabot sa iyang baruganan nga wala siya makombinsir sa ka grabi sa salaod nga nahimo ni Gutierrez aron kini i-impeach.

Dugang ni Alcover nga mas daghan karon ang dakung problema nga angay atubangon ang gobyerno kaysa pagpahigayon og impeachment nga unta moretiro naman usab si Gutierrez karong sunod tuig.

Gitumbok ni Alcover ang daghang mga OFW’s nga na-apiki karon gumikan sa kagubot didto sa Libya ug ubang mga nasud sa tunga -tungang sidlakan ug ang way kasulbaran sa pinatyanay nga nahitabo dinhi sa nasud ilabina didto sa Mindanao.

Dako ang pagtuo sa ANAD Partylist Representative nga pagdumot ang gipatigbabaw karun ning pagduso sa impeachment case batok kang Gutierrez ilabina kay tinudlo ug kaalyado kini ni kanhi Presidente Gloria Arroyo.

 Ang mga Sugboanong kongresista nga kauban ni Alcover nga mibotar supak sa impeachment mao sila si Deputy Speaker for the Visayas Pablo Garcia,anak niini nga si Pablo John Garcia sa 3rd district ug Benhur Salimbangon sa 4th district.

Samtang ang mga mibotar og Yes nga mga Sugboanong kongresista mao sila si Cong. Eduardo Gullas sa 1st district, Cong. Red Durano sa 5th district, Cong. Tomas Osmeña sa Cebu City South District, Cutie Del Mar sa Cebu City North District ug Luigi Quisumbing sa 6th district.  - BANAT NEWS