Giluba sa amahan ug anak, namatay

CEBU, Philippines - Namatay ang usa ka lalaki human kini tabangi og luba sa managsuon ug sa ilang amahan didto sa sitio Lindog sa barangay Tagbubunga sa lungsod sa Asturias sa miaging gabii.

Ang biktima mao si Samuel Ondoy, nga taga Asturias samtang ang mga suspetsado mao usab ang managsuong Reynaldo ug Betallano “Jojo” Pluma Jr. ug ang ilang amahan nga si Bellano Sr. nga mga silingan sa biktima.

Subay sa imbestigasyon sa kapolisan sa Asturias nga ang biktima ug ang mga suspetsado nag-inom niadtong higayona hangtud nga sila nangahubog.

Tungod kay lasbag na , dali kaayong nasuko ang biktima dihang giagbayan siya ni Jojo nga misangpot sa ilang panaglalis.

Si Reynaldo nga nakadungog nga miinit na ang panaglalis ni Jojo ug sa biktima, mitawag kini sa iyang amahan.

Ang amahan usab nga lasbag na, imbis motambag sa iyang mga anak, mitunol, na hinuon og kutsilyo ngadto kang Reynaldo.

Didto gisugdan dayon og panunggab ni Reynaldo ang kalawasan sa biktima , mitabang usab ang iyang igsuon ug ang iyang amahan nga maoy hinungdan sa kamatayon sa biktima.

Padayon pang gipangita sa kapolisan ang mga suspetsado human kini manibat.(WC) (BANAT NEWS)