Joavan gireklamo, apan reklamanteng drayber mibakwi

CEBU, Philippines - Gireklamo ang kontrobersiyal nga sinagop ni Mayor Socrates Fernandez nga si Joavan Fernandez sa usa ka drayber sa jeepney nga nagkarga og kahoy kagahapon sa kaadlawon.

Apan human ma-blotter ang reklamo ngadto sa kapolisan, gibakwi kini dayon sa reklamanteng si Jerick Balodo, 31, ug mipadayag nga ‘tumo-tumo’ lang ang iyang gisumbong batok ni Joavan.

Sumala pa sa blotter sa kapolisan, gidakop si Balodo kagahapon sa kaadlawon diha sa South Road Property habig sa barangay Cansojong dakbayan sa Talisay tungod sa pagkarga niya og coco lumber.

Matud pa niya sa reklamo mipasangil nga luwan sa usa ka Honda SUV si Joavan uban sa usa ka wala mailhing lalaki ug migukod kaniya hangtud na siya naabtan diha sa SRP.

Sumala pa niini, nga gidakop siya ni Joavan tungod kay nagbiyahe siya gawas sa iyang rota, wala hinuon mabutang sa blotter kun unsa ang rota sa jeep ni Balodo.

Human niini gikatahong gikuha ni Joavan ang lisensiya ni Balodo ug gimanduan siyang idiretso ngadto sa Vista Grande Subdivision sa barangay Bulacao ang iyang sakyanan aron didto sila magsabot.

Apan pag-abot nila sa ikaduhang gate sa nahisgutang subdivision si Joavan giingong nangayo og P5 mil ngadto kaniya aron iuli ang iyang lisensya ug ang yawe.

Tungod kay wala siyay kwarta wala siya makahatag kang Joavan apan giingong miabot si Mayor Fernandez ug giingong maoy nakig-estorya sa drayber ug giingnan siyang ipakuha ang lisensya niini sa iyang buhatan kagahapon sayo sa buntag.

Apan kagahapon sayo sa buntag si Balodo mibakwi sa una niyang pamahayag, dihang gipangutana sa Banat News kabahin sa hitabo nagdumili kini sa pagtubag.

Si Joavan sa sayo pa nga nahinabi sa Banat News kagahapon nagkanayon nga iyang nasugatan si Balodo diha sa barangay Camp 6, dakbayan sa Talisay nga nagkarga og mga kahoy.

Matud ni Joavan nga padulong siyang mokuha sa iyang mekaniko sa maong barangay dihang iyang nabantayan nga adunay mga kahoy gipangpaligid gikan sa ibabaw ug gikarga sa sakyanan ni Balodo.

Tungod niini iya kining gigukod ug gidakop. Ang mga sakop sa Department of Environment mianha sa Talisay City Police Station aron pagkuha sa nahisgutang mga kahoy. (BANAT NEWS)