Depositors sa Banco Filipino nadismaya

CEBU, Philippines - Nadismaya ang kagamhanan sa siyudad sa Sugbo sa Banko Sentral ng Pilipinas (BSP) human wala kini motunga sa tigom tali sa depositors sa Banco Filipino Savings and Mortgage Bank ug sa Philippine Deposit Insurance Corporation (PDIC).

Matud pa ni Cebu City Consultant Jade Ponce nga kinahanglan unta ang presensya sa taga BSP aron makahatag kini og eksplinasyon sa rason kung nganong nasira ang Banco Filipino.

“It was a little bit disappointing kay sa kadaghan nila’g tawo syaro naman sad…lets be candid lets inform ang atong katawhan…I was hoping, at least magpadala sila’g representative to explain the whole thing,” nagkanayon si Ponce.

Pagkakaron nagplano na usab ang siyudad sa susamang tigom aron masuta gyud ang tinuoray nga istado sa Banco Filipino.

“The fundamental question sa mga tawo gawas nga mabayran ba sila ug dili is that ngano’ng nahitabo ni siya on the first place and only the BSP can answer that,” dugang pa ni Ponce.

Gatosan ka mga depositors ang nagbaha sa Rizal Library kagahapon sa buntag alang sa pagtambong sa maong forum.

Gitagaan na sila og tagsa-tagsa ka claim form alang sa ilang insurance apan dili pa makahatag og insaktong petsa ang PDIC kung kanus-a kini ma-release gumikan kay nagpaubos pa sila karon sa inventory sa Banco Filipino.

Kahinumduman nga midangop ang mga depositors sa buhatan ni Mayor Michael Rama ug nagpakitabang kung unsa ang ilang buhaton sa giatubang nila nga problema.

Hangtud sa pagsuwat niining balitaa, duna gihapo’y mga namasin nga depositors ang kanunay nagbalik-balik sa mga buhatan sa Banco Filipino sa Juan Luna Avenue ug General Maxilom Avenue, ug sa A.C. Cortes sa Mandaue City. (BANAT NEWS)