10-anyos gisuwayan og dagit

CEBU, Philippines - Sulod lang sa pipila ka adlaw ang suway nga pagdagit sa mga batang tinun-an niadtong Huwebes sa usa ka tinun-an sa Vicente Rama Memorial National High School, laing usa ka 10-anyos nga babaye nga tinun-an sa Cebu Christian Center Church, Child Center ang buot untang dagiton sa duha ka lalaki.

Ang 10-anyos nga bata uban sa iyang ginikanan mitaho ug nagpa-blotter sa barangay hall sa barangay Capitol Site ning siyudad kagahapon sa buntag kabahin sa suway pagdagit sa anak. Si Gina (tinuod ngan gipugngan sa Banat News) misaysay   nga naglakaw siya paingon pauli sa ilang balay gikan sa tunghaan dihang kalit siyang gihunongan sa kolor puti nga van.

Matud pa niini nga mikanaog ang usa ka lalaki ug miduol kaniya nga mihangyong pasakyon siya tungod kay gahulat sa ilang pinuy-anan ang iyang mga ginikanan.

Apan nakurat siya dihang gikuptan sa maong lalaki ug gibitad pasulod sa sakyanan apan adunay usa ka drayber sa habal-habal nga nakakita ang misinggit pagbadlong hinungdan nga gibuhian siya sa maong lalaki ug misakay og balik sa van ug mipasirit palayo.

Si Kapitan Manuel Guanzon sa Capitol Site nagkanayon nga mopakatap siya og mga tanod aron mag-roving palibot sa nahisgutang tunghaan ilabi na nga manggawas ang mga tinun-an.

Si Rhodora Mendoza, principal sa nahisgutang tunghaan mitataw nga higpit ilang seguridad sa ilang mga tinun-an ug gidid-ang makagawas sa tunghaan gawas lang sa udto ug panahon nga sila buhian na sa mga magtutudlo ang mga bata. (BANAT NEWS)