CEBU, Philippines - Armas nga gituohang maoy gigamit sa usa sa duha ka tulisan pagpusil patay sa Field Training Police (FTP) sa Talisay City Police Station ang narekober sa mga sakop sa Provincial Intelligence Branch (PIB) atol sa buybust operation batok sa usa ka level 2 drug pusher niadtong Domingo sa alas-7 sa gabii diha sa Bulacao, Pardo ning siyudad.
Nakuha ang .45 nga kalibre sa armas ug usa ka bultong shabu diha sa posisyon sa dinakpan ug gipasanginlang level 2 drug pusher nga si Alfredo Rama, 42, sa nahisgutang lugar.
Ang kapulisan sa probinsya nakadawat og impormasyon nga gibaligya o giprenda ngadto sa usa ka drug pusher ang .45 nga kalibre sa armas ni Noel Simbajon alyas Noel Pacaña nga usa sa suspetsadong tulisan nga mipusil patay kang PO1 William Mangubat diha sa Mananga Bridge sa barangay Tabunok siyudad sa Talisay, kapin sa usa na ka semana ang nakalabay.
Matud sa kapulisan nga migamit sila og marked money nga P3 mil ug ‘budol money’ atol sa buy bust operation batok ni Rama aron mopalit og balor P35 mil nga shabu. Ang armas nga narekober giduso na sa PIB ngadto sa PNP Crime Laboratory aron ipa-ballistics examination pagtino kung mao ba kini ang armas nga gigamit ni Simbajon pagpatay kang Mangubat.
Si Rama sa dihang nahinabi sa mga tigbalita mitug-an nga diha na siya mahibawo sa mga awtoridad nga ang armas mao ba diay ang gigamit pagpusil patay sa maong pulis.
Si Rama mihimakak nga iyaha ang usa ka bultong shabu nga nakuha sa mga sakop sa PIB. Sumala pa niya nga giadto siya sa mga pulis niadtong Domingo sa gabii samtang siya nagpreparar sa barbecue nga iyang gibaligya ug nangutanang asa ang armas nga maoy gigamit sa tulisan pagpusil patay kang Mangubat.
Matud pa niya nga iyaha nalang gikuyogan ang mga pulis sa balay sa iyang bayaw diha sa Kinasang-ang, Pardo diin niya gibilin ang armas ug ang shabu didto ra usab makuha sa kapulisan. (BANAT NEWS)