Buy bust sud sa school

CEBU, Philippines - Usa ka graduating nga tinun-an sa high school ang nameligrong dili makapaso karong sunod bulan human kini masikop sa kapolisan sa gihimong buybust operation diha sulod mismo sa ilang tunghaan.

Ang pagkaaresto sa suspek (pangalan gipugngan sa Banat News) natigayon human makadawat ang kapolisan og report kabahin sa pagpamaligya niini og ilegal nga drugas sulod mismo sa ilang tunghaan.

Ang kapolisan sa San Remegio pinangulohan ni Sr. Insp. Jose Rovic Villarin ug si PO1 Brindo Mendoyos kinsa maoy nagsilbing poseur buyer maoy midakop sa maong tinun-an niadtong Lunes sa alas 11:15 sa buntag.

Matud ni PO3 Herman Bulawit sa San Remegio Police dihang nahinabi sa Banat News ang ilang buhatan nakadawat og tawag sa telepono nga nagpahibawo kabahin sa pagpamaligya sa suspek og mga linikit nga marijuana sud sa tunghaan.

Tungod niini miresponde dayon ang kapolisan ug gipahigayon ang pagpalit.

Dihang mi-order na ang polis og unom ka stick sa marijuana gitunol dayun niya ang bayad nga tulo ka tag P20 ug dihang gidawat na niya ang maong sticks sa marijuana diha-diha gidakop dayun kini sa mga naglibot nga polis diha gyud mismo sa palibot sa tunghaan.

Nakuha gikan sa posesyon sa suspek ang lain pang 19 sticks nga linikit nga marijuana ug duha ka P100 nga kwarta ug walo ka tag P20 apil na ang tulo ka P20 nga nagsilbing marked money sa kapulisan.

Ang kapulisan nagpahibawo dayun sa mga magtutudlo sa nasikop nga tinun-an ug gidala nila sa buhatan sa kapulisan ug gibalhog ug kagahapong adlawa gipasakaan na og kaso sa korte. (EIM) (BANAT NEWS)