Tanod sa Villagonzalo II napusilan

CEBU, Philippines - Nalandig sa tambalanan ang usa ka tanod human gipusil sa usa ka lalaki nga armado og KG-9 submachine pistol kagahapon sa alas-9 sa buntag diha sa sitio Looban Villagonzalo II sa barangay Tejero ning siyudad.

Nadakpan man tuod ang suspek ug gitabangan og kulata sa mga tawo, apan milanat pa og dugay human milatay sa atop sa mga kabalayan diha sa nahisgutang lugar nga naglakip sa balay ni Kagawad Gary Lao, reporter sa igsuong pamantalaan sa Banat News nga The Freeman.

Si Ramil Lim, 42, tanod sa nahisgutang lugar padayon pang giatiman sa mga doktor sa Cebu City Medical Center (CCMC) human nahiagom og samad pinusilan diha sa walang bukton nga milapos sa wala niyang kilid ug giingong miungot ngadto sa dapit sa iyang buko-buko ang bala.

Ang nadakpan ug nakaangkon usab og dakong pangos sa iyang luyo nga abaga mao si Bobby Arnel Cabahug, 24, nangangkong kanhi sakop sa Tau Gamma Phi apan mibalhin ngadto sa ‘Betans’ taga barangay Mantuyong siyudad sa Mandaue.

Si PO2 Jodan Batucan sa Homicide Section nga nahinabi sa Banat News nagkanayon nga mitubag sa armed person alarm si Lim apan pag-abot sa lugar gipusil dayon kini sa suspek.

Matud ni Batucan nga sa sinugdanan dunay gikabangi si Cabahug nga ginganlan og Dario diha sa nahisgutang lugar samtang nagduwa og video karera tungod sa pagpunay og tabis niini kaniya.

“Nasuko man siya (Dario) ngano kuno nga ‘tabis’ kaayo ko niya og tinan-awan..akong giingnan alang-alang man og dili ko motan-aw nimo (Dario) nga miagi kaman sa akong luyo, nasuko siya ato, iya unta kung gisukmag pero nakadagan ko,” asoy pa ni Cabahug.

Matud ni Cabahug nga mibalik siya sa dapit kagahapon sa buntag ug nagka- estorya sila ni Dario ug nagkauliay sa ilang kabubut-on apan giduol siya sa daghang mga tawo ug sa iyang kahadlok misulod siya sa balay sa iyang higala nga iya lang nailhan nga ‘Itchoy’ ug gikuha niya ang armas nga KG-9.

Si Cabahug milatay-latay sa atop sa kabalayan nga naglakip sa balay ni kagawad Lao human kini makapusil hangtud nga nakaikyas ug nakasakay og jeepney nga nagbitbit og armas hinungdan nga naalarma ang pasahero sa PUJ diha sa Mabolo.

Si SPO1 Junivan Villanueva sakop sa Speed Cop nga miresponde sa maong alarma maoy nakadakop kang Cabahug nga naglakaw nalang diha sa Bagong Dalan apan dihang nakit-an ang polis gilabay niini ang armas apan nadakpan gyud kini. (EIM) - (BANAT NEWS)