Kaluhang puya gilabay

CEBU, Philippines - Gituohang kaluha nga puya ang napalgan kilid sa usa ka sapa sa barangay Sambag Dos pasado alas-8 kagahapon sa buntag.

Sa report sa Balitang Bisdak, nasayran nga ang mga residente sa nahisgutang barangay maoy nakakaplag sa maong puya nga gibanabanang upat pa ka buwan.

Matud pa ni Aurelio Jagmoc, konsehal sa maong barangay nga posibleng molupyo lang sa maong lugar ang naglabay sa maong duha ka puya.

Dako usab ang pagduda sa pipila ka mga residente nga posibleng tinun-an lang nga nag-abang og boarding house sa maong lugar ang naglabay sa maong puya.

Base sa mga nangaging insidente sa pagkakaplag sa mga puya nga gituohang gipataktak, sagad daghang kaso niini panahon nga tingsira sa mga klase sa bulan sa Marso, bakasyon sa bulan sa Disyembre ug semestral break.

Sumala pa sa usa sa mga imbestigador sa Homicide Section niadtong milabay’ng Disyembre sa 2009 dihang siyam ka puya ang nakaplagan sulod lang sa usa ka semana, posibleng mga estudyanteng napamabdosan ang mga responsable sa maong pagpataktak og mga anak. - (BANAT NEWS)