Pooc wala ka-liquidate sa P800 mil

CEBU, Philippines - Ang administrasyon karon sa barangay Pooc, dakbayan sa Talisay maglisud og pangayo og hinabang sa kagamhanan sa probinsiya tungod kay wala pa kini maka-liquidate sa P800,000 nga hinabang nga gihatag sa Kapitolyo kaniadto.

Si Kapitan Dory Emit mibutyag nga gihikay na nila karon ang mga papeles aron makompleto na ang listahan sa mga gigastohang proyekto sa barangay   sa kantidad nga P800,000 nga gihatag sa kagamhanan sa probinsiya niadtong tuig 2005-2008.

Si Emit kinsa ubos sa landong sa oposisyon maoy napiling kapitan sa nahisgutang barangay niadtong milabay’ng eleksiyon sa barangay ug Sangguniang Kabataan.

Matud niya nga misuway siya og duol ngadto sa kagamhanan sa probinsiya aron mangayo og pinansiyal nga hinabang apan nasayran niya nga ang gipulihan niyang kapitan wala pa maka-liquidate sa P800,000 nga hinabang sa probinsiya kaniadto.

Ang nasundan ni Emit nga kapitan sa barangay mao si Osmundo Manreal Jr. diin ang termino niini isip kapitan sa barangay nahuman niadtong Oktubre sa milabay’ng tuig.

Hinuon si Manreal maoy napiling first councilman sa Pooc niadtong milabay’ng eleksiyon sa barangay apan sa milabay’ng semana miluwat kini sa iyang katungdanan kay mibalhin kini og puyo uban sa iyang pamilya ngadto sa Estados Unidos.

Matud ni Emit nga moduso siya og affidavit ngadto sa Kapitolyo aron iyang ikapasabot nga dili siya maoy manubag sa wala ma-liquidate nga kuwarta sa Kapitolyo nga gihinabang ngadto sa barangay Pooc sa panahon pa ni Manreal.

Si Emit pormal nga milingkod puli ni Manreal niadtong Disyembre 1, 2010.

Midugang usab siya nga mo-request siya sa Commission on Audit nga ipasusi ang financial book sa ilang barangay. (BANAT NEWS)