Senior citizen giatake nalumos

CEBU, Philippines - Usa ka senior citizen kinsa gituohang giatake sa alta presyon samtang nanginhas, nalumos ug napalgang patay nga naglutaw sa dagat sa barangay Inuburan, dakbayan sa Naga pasado alas 11:00 sa buntag kagahapon.

Si Mario Basalo, 66, minyo, nga taga sitio Purok Nangka, gidali og hatod ngadto sa Minglanilla District Hospital diin didto kini gideklarar nga patay na sa pag-abot sa maong tambalanan.

Nasayran nga si Basalo nanginhas sa honasan sa Inuburan kagahapon sayo sa buntag, apan gituohan sa mga tagtungod nga giatake kini sa alta presyon sa iyang pagpanginhas.

Si PO1 Organe Lungtad, duty desk officer sa Naga nga nahinabi sa Banat News kagahapon nagkanayon dihang giatake sa sakit nga high blood si Basalo, walay nakatabang kaniya hinungdan nga nalumos kini sa dagat.

Matud ni Lungtad nga mga alas 5:00 sa buntag kagahapon si Basalo nananghid sa iyang asawa nga manginhas.

Unya giingong miubog kini sa tubig nga taga-hawak ang giladmon kay nanikop og isda.

Usa ka batang lalaki kinsa nagduwa-duwa sa baybayon maoy unang nakakita kang Basalo nga naglutaw na sa tubig. (BANAT NEWS)