Gipatay sa manghod

CEBU, Philippines -    Migahi na ug wala nay kinabuhi nga napalgan sa iyang igsuon ang usa ka batan-on nga nakaangkon og bun-og sa ulo ug kalawasan nga gituohang binuhatan sa lain usab nilang igsuon diha sa sitio Cada-atan sa barangay Sumaguan sa lungsod sa Argao.

Ang insidente nahitabo kagahapon sa kaadlawon diin ang biktimang si Erwin Quinto Batosalim, 25, giingong gi-unay og bunal dukdok og bato sa iyang manghod nga si Jaymar Batosalim, 22.

Sa pakighinabi sa Banat News ni PO1 Bernard Banugon, sa Argao Police Station mibutyag kini nga nianang pagkagabii ang biktima ug ang suspek nag-inom sa usa ka tindahan sa nahisgutang lugar.

Tunga-tunga sa ilang panag-inom mitumaw ang panaglalis sa duruha sa wala pa masayring hinungdan ug nagsumbagay hangtud nga nakapunit og bato ang suspek ug gihapak ang maguwang sa ulo.

Dali usab nga naulang ang duha sa ilang mga silingan apan ang biktima nagmulo nga katulgon ug kalit nga mihigda sa waiting shed nga duol ra usab sa nahitaboan diin kini giingong gibiyaan ra usab sa mga kauban.

Nianang pagkakaadlawon ang magulang sa biktima nga usa ka barangay tanod sa maong lugar maoy nakakaplag niini diha sa waiting shed ug gipukaw apan sa iyang paghikap bugnaw na kini ug migahi na.

Hinungdan nga nangayo kini og pakitabang ug mireport ngadto sa kapolisan diin ang kapolisan dali usab nga misikop sa manghod nga suspetsado human nila masayri ang nahitabo.

Matud pa ni Banugon nga ila pa usab nga gipaabot ang resulta sa awtopsiya pagtino kung unsay gikamatyan sa biktima apan dako ang ilang pagdudang posibleng ang paghapos og batok sa ulo maoy nakaingon sa kamatayon niini. (EIM) (BANAT NEWS)