2 ka tulisan natiklo

CEBU, Philippines - Nadakpan ang duha ka gikatahapang tulisan nga mitulis sa usa ka batan-ong lalaki sa dalan Hernan Cortes sa barangay Subangdaku, dakbayan sa Mandaue sa miaging tungang gabii.

Ang nadakpan mao sila si Ryan Camahalan ug Jerome Camahalan, pulos hingkod, nga taga Subangdaku.

Si PO1 Herbert Pelayo sa Presinto 2 sa Subangdaku Police Station miingon nga ang duha ka dinakpan maoy suspetsado sa pagtulis kang Joseph Diaz, 20, nga taga sitio Puso, dalan F. Ramos sa dakbayan   sa Sugbo.

Ang duha gitanggong karon sa detention cell sa Presinto 2 ug gipaabot sa pagpatim-aw sa biktima aron sa pag-ila sa mga dinakpan ug sa pagpasaka og kaso ngadto sa korte.

Matud pa ni PO1 Pelayo nga naglakaw sa maong dapit ang biktima dihang kalit lang gitionan sa mga suspetsado og armas dungan ang pagdeklarar nga tulis.

Nakuhaan ang biktima sa iyang pitaka nga may sulod nga P20 ug cellphone nga nagkantidad og P3,000.

Samtang si SPO3 Fernando Gabutero sa kapolisan sa Presinto 4 miila usab sa laing nabiktima sa tulis nga mao si Arve Bentulan, 26 , nga taga Casuntingan sa maong dakbayan.

Gitulis kini alas 10:00 pasado sa miaging gabii sa dalan A.S. Fortuna sa barangay Banilad sa maong dakbayan pinaagi sa duha ka tulisang de motor.

Ang biktima nakuhaan sa iyang pitaka nga may sulod nga P100, ug cellphone.

Kahinumdoman nga sa miaging semana sa mao gihapong dapit tulo ka mga kolektor sa usa ka lending firm sa maong dakbayan gitulis gihapon og mga tulisang de motor.

Ang mga molupyo sa maong lugar nagkanayon nga wala gyuy nahimo ang kapolisan sa pagsanta sa mga tulisang de motor sa dakbayan sa Mandaue. (BANATNEWS)