Ms. Mandaue pasuoton gihapon og swimsuit

CEBU, Philippines - Malakip gihapon sa kategoriya ang best in swimsuit sa Miss Mandaue 2011 bisan paman sa gipatumang ordinansa nga nagdili sa paggamit sa kababayen-an sa mga law-ay’ng kalihukan.

Ang maong pageant gikatakdang ipahigayon sa dili pa ang pista sa Mandaue karong Mayo 8 niining tuiga.

Si Emelio Pascual nga maoy executive director sa mga kalihukan sa tinuig nga pangilin sa dakbayan karong tuiga nga nahinabi sa mga tigbalita ang mipadayag nga lahi hinuon nga matang sa swimsuit ang isul-ob sa 16 ka mga opisyal nga kandidata.

Matud pa nga ang desenyo niini susama sa misikat nga swimsuits sa tuig 1950’s ngadto sa 1970’s nga makapahulma sa ilang katahom ug seksi gihapon nga tan-awon.

Gitataw niya nga higpit nilang gidili ang naandang swimsuit sanglit hugot man kining gisaway sa relihiyosong katilingban ug supak usab kini sa mga lagda nga gipatuman sa kagamhanan sa lalawigan.

Matud pa ni Pascual nga ang Miss Mandaue ug Mr. Mandaue maoy mga nag-unang dagkong kalihokan sa tinuig nga pangilin nga gihan-ay sa dakbayan karong tuiga.

Dugang pa niya nga daghan pang nahan-ay nga mga bag-o nga kalihokan nga nalakip karong tuiga nga naglakip sa pagluto og higanteng bibingka, grand baile, market vendor ug driver’s day, basketball tournament sa mga bakol ug mga kimay ug uban pa. (BANATNEWS)