P1.2M shabu, mga armas nasakmit sa buybust

CEBU, Philippines - Nasakmit ang mokabat sa P1.2 milyones nga kantidad nga gituohang shabu ug ingon man mga armas ug mga bala gikan sa panimalay sa gikatahapang drug pusher niadtong milabay’ng adlaw diha sa dalan Echevarie sa barangay Mantuyong, dakbayan sa Mandaue.

Apan nakaikyas ang mga suspetsadong sila si Alek Mamac ug kapuyo niini nga si Asliah Diva sa dihang gironda sa mga sakop sa City Anti Illegal Drug Special Task Force (CAISOTF) sa Mandaue City Police Office (MCPO) nga gipangulohan ni Insp. Henry Bangcoleta ug grupo ni Insp. Wilson Abot sa Presinto 5. Matud pa ni Abot nga gipasulod ang ilang police decoy sa hagip-ot nga dalan sa maong dapit diin usab mahimutang ang panimalay sa mga suspetsado nga maoy nasentro sa ilang buy bust operation.

Apan human matigayon ang transaksyon ug giposasan ang duha nakalighot sila ug nakadagan sa sudlonong bahin sa maong lugar ug wala na igkita.

Dihang gisusi sa kapolisan ang balay sa duha nadiskubrehan ang 21 ka dagkong pakete sa shabu nga mokabat sa 105 gramo nga gituohang shabu ug mga armas nga naglakip sa kalibre .45 nga puno sa bala ang magazine, kalibre .22 nga puno sa bala ug kalibre .357 ug mga bala niini.

Bisan nakaeskapo ang duha mopasaka gihapon og kaso ang kapolisan batok kanila sa kalapasan sa Republic Act 9165 kon illegal nga paghupot og shabu ug kalapasan sa Republic Act 8294 kon illegal nga paghupot og armas ug mga bala niini. (BANATNEWS)