CEBU, Philippines - Namatay nga batang si Ellah Joy Pique kanunay nang nagpadamgo sa iyang inahan ug maguwang samtang nagkaduol na ang kasumaran sa kamatayon niini karong Sabado.
Si Renante Pique ang amahan ni Ellah Joy kinsa gidagit ug gipatay miingon nga wala hinuon mohatag og kahulogan si Ellah sa pagpadamgo niini apan nagtuo silang nalipay kining nasayod nga wala gyud mobiya ang iyang mga ginikanan sa pagpangita sa hustisya alang kaniya.
Si Renante nagtuong nagsubay ang task force sa hustong dalan aron mahatag kanila ang hustisya nunot niining mga bag-ong kalamboan nga duna nay laing gitumbok nga posibleng may kalambigitan sa kamatayon sa iyang anak.
Matud pa ni Renante Pique, sa diha nga mibisita sa headquarters sa Cebu Provincial Police Office nga dili lang niya dali-dalion ang kapolisan nga makapasaka dayon og kaso sanglit buot niyang plantsado na kini nga mapasaka ngadto sa korte.
Samtang ang Officer-In-Charge sa CPPO, Sr. Supt. Patrocinio Comendador ug maoy tigpamaba sa task force mipatawag usab ni Pique kini aron hatagan siya og impormasyon kalabot sa kalamboan sa kaso nga ilang gihimo.
“Ako lang usa tahoron, gusto siya nga confidential lang usa ang among transaksyon,” pasabot pa ni Comendador apan giklaro niyang wala niya pasaligi si Pique gawas lang nga pangitaan gyud nila og pamaagi nga masulbad gyud ang kaso sa iyang anak.
Ang kapolisan pabiling nagpaabot sa resulta kalabot sa ilang gisang-at nga motion to take custody of the evidences.
“I think kining panahona karun is really a battle of strategy between two parties na, nga modepensa, amo lang nga dili lang mo-preempt ang amo, kay the more mohatag mi, I think, the more mi mag dish out og mga information to compromise this investigation, the more that we cannot give justice to the death of Ellah Joy that she really deserves,” pasabot pa ni Comendador. (BANAT NEWS)