Pito patay sa landslide

PALO, LEYTE, Philippines  – Patay ang pito ka sakop sa usa ka pamilya sa amihanang bahin sa Tacloban City human sa nahitabong landslide nga mitabon sa ilang panimalay niadtong gabii sa adlaw’ng Miyerkules.

Ang Office of the Civil Defense OIC-regional director nga si Peps Pabilona mipagawas sa maong report human gikompirmar ni Department of Health-8 director Edgar Gonzaga nga ang nakalas sakop sa pamilyang Jordan kinsa pulos gidala sa Eastern Visayas Regional Medical Center apan gideklarar nga mga dead on arrival.

“Wala pa sila ibinigay na mga pangalan nang mga namatay, but it was already confirmed and reported by the DOH highest official and were still monitoring other similar incidents across the region,” matud pa ni Pabilona.

Si Pabilona nagkanayon nga ang landslide nahitabo tungod sa tulo ka adlaw nga walay puas nga pag-ulan sukad pa niadtong Lunes.

Gawas sa panimalay sa mga Jordan aduna pay laing lima ka panimalay ang naigo diha sa barangay Nulatula sa sayo pa nianang gabhiuna. Wala hinuoy natalang nasakitan o nakalas sa maong insidente sanglit daling nakagawas ang mga nagpuyo niini.

Matud pang Pabilona nga padayon pa karon ang gihimong search and rescue operations sa siyudad sanglit 90 porsiyento sa 138 ka barangay sa maong siyudad nga gilunopan og baha.

Sa barangay CCF-Diit, sa samang siyudad, 12 ka pamilya ang naapektahan tungod sa duha gihapon ka balay nga naigo sa landslide.

Matud pang Pabilona sa The Freeman (igsuong pamantalaan sa Banat News) nga kapin sa 3,000 ka tawo gikan sa nagkadaiyang barangay sa Tacloban ang midangop sa Convention Center, Balyu-an Tower, San Jose Barangay Hall, ug barangay Nula-tula Multi-purpose Center aron makapasilong.

Si Senior Supt. Wilson Caubat ang pangulo sa kapolisan sa maong dakbayan nagkanayon nga gi-deploy na ang mga sakop sa City Public Safety Company kagahapon aron motabang sa pagpabakwit sa mga residente sa Barangay Apitong nga usa sa labing nagrabehan sa gibahaan.

Dugang pa ni Pabilona dili na usab maagian ang nagsangang dalan padulong sa Ormoc City ug Southern Leyte tungod sa paglapaw sa baha diha sa taytayan sa Palo Leyte.

Sa Southern Leyte, nakasinati usab og landslide ang mga residente sa barangay Buac Gamay sa Sogod tungod gihapon sa way puas nga uwan, wala hinuoy natalang nangaangol o nakalas sa maong hitabo apan adunay 30 ka pamilyang gipabakwit sa gym sa lungsod.

Susamang gagmay’ng landslide gihapon ang natala sa barangay Patane sa lungsod sa Paranas sa Samar, ug nabara usab ang dalan padulong sa Borongan City sa Eastern Samar.

Sa laing bahin, sa report sa sibyaanang DYLA-Cebu kagahapon usa ka 65-anyos nga lalaki ang namatay sa baha diha sa lungsod sa Sierra Bullones sa Bohol.

Samtang sa interbyu sa Balitang Bisdak sa focal person sa Municipal Disaster Risk Reduction Management sa maong lungsod nga si Restituto Perocho miingon nga adunay batang nakalas gihapon sa maong lungsod, giingong flashflood ang hinungdan.

Ang mga lungsod sa Jagna, Dimiao, Garcia Hernandez ug Bilar giingong naigo usab sa grabeng pagbaha. (EIM) (BANAT NEWS)