Supermoon ugma sa kaadlawon

CEBU, Philippines - Ugma sa kaadlawon masaksihan ang talagsaong paggawas sa buwan nga dako kaayo sa normal nga gidak-on niini nga gitawag sa mga siyentipiko nga “super moon” sumala pa ni senior weather specialist sa Philippine Atmospheric, Geophysical and Astronomical Service Administration- Mactan nga si Alfredo Quiblat Jr.sa Banat News.

Si Quiblat nagkanayon nga ang tawag niini moon perigee nga mahitabo kun ang pagtuyok sa buwan duol kaayo ang distansya sa kalibutan nga moresulta maong dako kaayong tan-awon ang buwan.

Ang pagduol sa buwan moresulta sa dako kaayong taob sa kadagatan apan wala pa kini mohatag og katin-awan kun kinahanglan bang mobakwit ang mga molupyo sa kabaybayunan.

Gitambagan hinuon niya ang mga tawo duol sa dagat nga kanunay mabinantayon sa ilang palibot.

“Sa pagka-karon gi-monitor na namo pag-ayo, basta ang common gyud nga mahitabo ana, kay dunay high tide,” sumala pa ni Quiblat.

Gisalikway usab ni Quiblat ang mga nanggawas nga mga ‘panagna’ nga magbunga kini og kalamidad sama sa tsunami ug uban pa.

“Ang super moon kay distansya sa moon ug earth ang hinungdan, samtang ang tsunami mahitabo kung naay volcanic eruption sa ilawom sa dagat,” sumala pa ni Quiblat.

Base sa report sa Yahoo News nga atol sa perigee ugma, ang buwan ug ang kalibutan may gilay-on lamang sa usa’g usa nga 221,567 milya (356,577 kilometers) sukwahi sa naandang 238,000 milya (382,900 km).  - BANAT NEWS