Delivery boy wa palabya sa tulisan

CEBU, Philippines - Bisan delivery boy og pan gidaginot sa mga tulisan atol sa nahitabong pagpanulis diha sa barangay Liburon sa lungsod sa Carmen niadtong Martes sa buntag.

Nasakiyo ang halin nga P3 mil sa biktimang si Leo Duterte, 20, delivery boy sa usa ka bakery ug nagpuyo sa barangay Guinsay siyudad sa Danao samtang tulo ka mga armadong lalaki nga pulos nagtaptap sa nawong og senina ang gitumbok nga mibiktima kang Duterte.

Matud ni SPO1 Danilo Laurente, desk officer sa Carmen Police dihang nahinabi sa Banat News nga gikan naghatud og pan si Duterte ug padulong balik sa bakery apan kalit gibabagan ang motorsiklo niini.

Gikatahong giti-onan ang biktima sa mga tulisan og wala matinong kalibre sa armas ug pugsanong gikuha ang nakolektang halin sa pan.

Matud pa tungod kay mingaw ang lugar yano rang nanglakaw ang mga tulisan palayo. Ang biktima igo nalang sa pagdangop sa buhatan sa kapulisan ug pagpa-blotter sa maong panghitabo.(Darrel Carumba/EIM) (BANAT)