Mananga gibutangan na og polis

CEBU, Philippines - Pabutangan na og nagpatrolyang polis ang taytayan sa Mananga sa dakbayan sa Talisay aron mapakgang na ang nagsunod nga insidente sa pagpanulis sa maong dapit nga ang biktimahon mao ang mga pasaheroan ug anha sa ilawom sa taytayan modagan ang mga tulisan.

Apan ang pagbutang og nagpatrolyang polis natigayon lamang human ang mismong polis na gyud nga miresponde sa pagpanulis ang gipatay sa mga tulisan niadtong milabay’ng semana.

Si PO1 William Mangubat Jr. mirespondeng walay armas dihang gipangayoan og tabang sa usa ka pasaherong gitulis luwan sa usa ka multicab nga pasaheroan nga miresulta hinuon sa pagkapusil sa maong polis ug nakaikyas ang mga tulisan.

Ang kapolisan mibutyag nga ang mga suspek pagpatay kang Mangubat mao sila si Noel Simbajon alyas Noel Pacaña ug magsuong Lito ug Jundy Oros.

Dili lang kini ang unang insidente sa pagpanulis nga nahitabo diha sa maong taytayan sanglit sukad pa niadtong milabay’ng tuig aduna nay dili mosobra ka 20 ka insidente sa pagpanulis sa maong dapit apan sukad pa kaniadto permanenteng adunay report nga gitulis sa maong dapit apan walay polis nga permanenteng gibutang aron magbantay sa maong lugar.

Si Sr. Insp. Errol Francis Deveyra ang officer-in-charge sa Talisay City Police Station mitug-an nga nagsugod ang foot patrol ilawom sa Mananga Bridge niadto pang Lunes.

Ang nahisgutang unom ka polis magsugod sa ilang patrolya gikan sa alas 7:00 sa buntag hangtud sa alas 5:00 sa hapon ug mamalhin og bantay diha na mismo ibabaw sa taytayan ini og alas-5 sa hapon hangtud gabii.

Ang sitio Mananga gibana-banang dunay 1,000 ka mga molupyo nga dili lumad nga taga Talisay ug nabaniog na sa publiko nga dagananan ug tagoanan sa mga tawong dunay nahimong krimen o kalapasan sa balaod.

Ang barangay kapitan sa nahisgutang barangay nga si Manuel Cabriana matud pang Deveyra mipadala na og tanod nga mogiya sa foot patrol.

Sa laing bahin, si Deveyra nagkanayon usab nga gusto niyang ipadayon ang plano kaniadto ni Supt. Henry Biñas nga butangan og sub-station diha sa Mananga aron mas mabantayan ang maong dapit. (EIM)  (BANAT)