Kolektor sa lending gitulis sa nagmotor

CEBU, Philippines - Himabaw sa P10 mil ang nasakiyo sa duha ka wala hiilhing tulisang de motor kinsa mitulis sa usa ka kolektor sa lending company didto sa sitio Tapal, sa barangay Guadalupe, siyudad sa Carcar sa miaging udto.

Si PO3 Jose Repompo, desk officer on duty sa Carcar Police station nga nahinabi sa Banat News pinaagi sa telepono miila sa biktima nga si Federico Magsalay, 38, taga barangay Tisa, siyudad sa Sugbo, ug collector sa SG & B Lending Corporation.

Duha ka lalaking nagsakay og kolor itom nga motorsiklo nga pulos nagsul-ob og itom nga helmet ug itom nga jacket ang mitulis sa biktima.

Segun pa sa asoy sa biktima nga gikan siyang naningil ni Maricel Tantano sa nahisgutang lugar dihang mosakay na unta siya sa iyang motorsiklo ug kalit lang may mihunong nga motorsiklo sa iyang atubangan diin dali kaayong nanaog ang angkas niini dayong tion kaniya og armas de fuego ug mideklarar nga tulis.

Gumikan sa kalisang niyang hunosan siya sa kinabuhi, gihatag nalang niya ang iyang koleksyon nga P2,700, personal nga kuwarta P2,800 ug cellphone nga nagkantidad og P2,400.

Human molampos sa pagpanulis, dali kaayong nakapahilayo sa maong lugar ang mga tulisan samtang misumbong usab dayon sa kapolisan ang biktima.

Matud ni Repompo nga niadtong katapusang semana sa miaging Pebrero, laing collector usab sa lending ang gitulis gihapon sa duha ka lalaking nagsakay og motorsiklo sa mao gihapong barangay sa Guadalupe.

Nagtuo ang kapolisan nga posibling ang tulisan taga Carcar ra o kaha sa kasikbit nga lungsod sanglit daghang lutsanan ang dakbayan sa Carcar paingon sa Pinamungahan, Aloguinsan o kaha sa lungsod sa Argao.

Hinuon ang kapolisan padayong mihimo karon og follow-up niining maong kaso aron mailhan ang mga gikatahapan nga posibling usa lang kini ka grupo.(Rey B. Pasaporte/WC) (BANAT)