Trusong Gemelina sakmit

CEBU, Philippines - Nakompiska sa mga kapolisan ang kargamentong mga truso nga Gemelina didto sa South Road Properties habig sa barangay Cansojong, dakbayan sa Talisay sa miaging hapon.

Si PO2 Reynato Pendo , uban ni SPO2 Sherwin Abellare nga maoy nakasakmit sa maong mga kahoy nagkanayon nga gibana-banang mokabat ngadto sa 40,000 board feet ang nahisgutang mga lumber.

Nabantayan sa nahisgutang mga polis ang usa ka Isuzu drop-side nga truck nga nagtangag sa plakang GRW-571 nga nagbaguod sa kargamento niining mga truso sa nahisgutang lugar

Ila dayon kining gipara ug sa dihang mihunong na ang maong sakyanan , ilang gisita ang drayber nga si Leomedis Armero, 51, nga taga barangay Budla-an, Talamban, dakbayan sa Sugbo , ug gipangitaan nila kini og mga dokumento sa ilang kargamentong mga kahoy.

Nasuta sa mga polis nga ang dokumento sa pagbiyahe sa maong mga kahoy nabahas na.

Ang maong mga lumber gikan sa dakbayan sa Mandaue ug ihatod unta ngadto sa barangay Pooc, Talisay dihang nasugatan kini sa kapolisan ug nasakmit tungod kay walay papeles ang nagdala niini.

Ang maong mga kahoy ubos karon sa kostudiya sa Talisay City Police Station sa barangay Poblacion.

Kagahapon nagpaabot ang kapolisan sa mga sakop sa Department of Environment and Natural Resources (DENR) nga may mokuha sa mga lumber. (Brenda D. Batuto/WC) (BANAT)