OWWA way nadawat nga taho bahin sa OFW sa Japan

CEBU, Philippines - Ang Overseas Workers Welfare Administration (OWWA) 7 kagahapon walay nadawat nga update sa mga ‘missing’ nga Overseas Filipino Worker, (OFW) ngadto sa Japan kini maoy gibutyag ni Reynaldo Jacalan, officer-in-charge (OIC) Program and Services.

Si Jacalan sa pakighinabi niini sa Banat News kagahapon nagkanayon nga wala pay miduol sa ilang buhatan nga mga paryente sa mga nabiktima sa linog sa Japan gawas lang sa usa ka tawo apan wala pod nila makuhai og ngalan .

Ang maong tawo nakapahimulos sa libreng tawag sa Globe Lines sa pagtawag niini sa iyang mga paryente didto sa Japan ug giingong luwas ang mga paryente sa maong tawo.

Matud ni Jacalan nga naghuwat pa sila sa ipadalang update gikan sa buhatan sa OWWA sa Japan.

Si Jacalan midugang nga base sa ilang talaan mikabat sa 2,347 ang gidaghanon sa OFW nga miyembro sa OWWA nga nanarbaho sa Japan.

Sa laing bahin, base sa report sa ABS-CBN News kagahapon sa hapon nga adunay bus nga gipadala ang embahada sa Pilipinas ngadto sa Sendai nga nag-estambay aron mokuha sa mga Filipino kinsa andam nga temporaryong ma-relocate ngadto sa Tokyo.

Ang maong bus miabot ngadto sa Sendai uban sa team sa embahada niadtong Lunes sa gabii.

May mga Filipino sa mga lugar nga naapektohan sa linog nga nagdumili sa pagbiya kay nawili sa ilang mga kabtangan ug pamilya.

Gikataho usab nga aduna nay kakuwang sa pagkaon ug tubig sa mga evacuation center tungod kay lisud na ang pagbiyahe ngadto sa mga apektadong lugar.

Base sa taho may 4,000 ka mga Filipino ang nagbase sa Tohoku region.

Si Consul General Sulpicio Confiado giingong nangayo og panabang sa mga lider sa Filipino community didto sa Japan sa pag-contact sa mga Pinoy nga nahimutang sa mga siyudad ug coastal area sa Japan.