Ikatulong nuclear reactor sa Japan miulbo, radiation misaka

CEBU, Philippines - Miulbo ang ikatulong nuclear reactor sa Fukushima sa Japan ug daling gipahimangnoan sa Primero Ministro sa Japan nga si Naoto Kan nga misaka ang radioactive level ug nagkadako ang tsansang mosaka pa ang radioactive leak.

Nunot niini gimando ni Naoto Kan sa mga nagpuyo duol sa maong planta nga mobalhin una 30 kilometros palayo sa maong pasilidad ug manirado sa ilang mga balay. Gimando na usab ang kanunay’ng pagpahigayon og radiation check sa mga residente human sa pagbuto.

Ang Chief cabinet minister sa Japan nga si Yukio Edano nagkanayon nga misaka ngadto sa 400 milliseiverts (mSv) matag oras ang radiation level sa amihanang-sidlakang bahin sa ilang nasud, kini usa ka libo ka pilo sa level sa wala pa ang pag-ulbo.

Ang mga operator sa maong reactor nangayo na og tabang sa militar sa US, samtang si Kan namahayag nga padayon ang ilang paningkamot nga dili mokatap ang leak.

Ang mga tinugyanan sa Japan mibomba og daghang tubig gikan sa dagat diha sa ilang mga reactor sa Fukishima Daiichi complex aron mabugnawan kini ug mapugngan ang pag-ulbo apan bisan paman niini padayon ang pag-init sa maong reactor ug miulbo.

Ang maong mga trahedya sa Japan gikabalak-ang maoy makapalusbo sa ilang ekonomiya human kalit mitibugsok ang Japanese stocks sa kalibutanong merkado og 7.0 porsiyento.

Ang mga rescuers gikan sa nagkadaiyang nasud nagsugod na og pangabot sa Japan, gikatakdang mopadala og 40-man team ang Pilipinas nga langkuban sa mga sakop sa Armed Forces of the Philippines, Department of Health ug mga sakop sa Emergency Rescue Unit Foundation gikan sa Cebu City.

Samtang dinhi sa Pilipinas gimando ni Department of Justice secretary Leila De Lima ang pagpangita sa tinubdan sa ‘text-scare’ sa radiation nga nakapabalaka sa publiko niadtong Lunes. Buot sa DOJ nga masilutan ang mihimo-himo niini.

"We should not underestimate the consequences of false texts and false alarms. It can have really injurious consequences and therefore, must be taken seriously. Actions must be taken against these," matud pa ni De Lima sa GMA News.Tv.