P100 mil iganti sa makatudlo sa krimina

CEBU, Philippines - Ang konseho sa dakbayan sa Talisay mipasar og resolusyon nga nag-awhag kang Mayor Socrates Fernandez nga mogahin og P100 mil nga reward money alang sa makatudlo sa nahimutangan sa tulo ka mga suspetsado kinsa mipusil patay kang PO1 William Mangubat Jr.

Gawas niini mipasar usab og resolusyon ang konseho nga mohatag og P50 mil nga hinabang ngadto sa pamilya ni Mangubat. Si Public Information Officer Arturo Bas nagkanayon nga si Konsehal Romeo Villarante maoy nangamahan sa resolusyon kabahin sa reward money samtang si Bise Mayor Alan Bucao maoy nangamahan sa resolusyon kabahin sa hinabang pinansiyal.

Gawas sa kagamhanan sa siyudad, ang Provincial Social Welfare and Development, Human Rights ug ang National Police Commission (NAPOLCOM) mohata’g usab og hinabang pinansiyal ngadto sa pamilya ni Mangubat.

Si Senior Inspector Errol Francis Deveyra ang officer-in-charge sa Talisay City Police Station sa pakighinabi niini sa Banat News kagahapon mibutyag nga ang nahisgutang tulo ka buhatan nangayo na og mga dokumento pagmatuod nga si Mangubat nadisgrasya atol sa iyang duty aron ikahatag ang pinansiyal nga hinabang.

Matud usab ni Deveyra nga giandam na nila ang kasong ipasaka batok sa magsuong Lito ug Jundy Oros ug Noel Simbajon alyas Noel Pacaña kinsa maoy mga suspetsado sa pagpusil patay kang Mangubat.

Hinuon matud niya nga padayon pa ang ilang hot pursuit operation batok sa tulo. Gibutyag usab ni Deveyra nga base sa ilang nahipos nga report nga si Mangubat gitabangan sa tulo dihang migukod kini sa usa ka tulisan nga mitulis sa pasahero sa PUJ niadtong Biyernes sa hapon.

Ang magsuong Oros pulos notado ug nasikop na sila sa kapolisan sa Talisay sa kasong robbery kaniadto.

Kahinumdoman nga si Mangubat kinsa walay armas niadtong higayona nag-inusara nga migukod sa usa ka tulisan nga nagbitbit og pistola ug bag sa iyang biktima sa pagpanulis diha sa ilawom sa tulay sa Mananga, barangay Tabunok, dakbayan sa Talisay.  - BANAT NEWS