5 doktor sa CENTCOM ipadala sa Japan

CEBU, Philippines - Lima ka mga doktor sa Central Command ang ipadala didto sa nasud sa Japan aron motabang sa libo-an ka mga biktima sa trahedya tungod sa 8.9 magnitude nga linog nga mimugna og tsunami sa maong nasud niadtong Biyernes.

Ang tigpamaba sa Centcom Maj. Christopher Tampus mibutyag sa Banat News nga kagahapon sa mga alas 10:00 sa buntag nakadawat sila og kamanduan gikan ni AFP chief of staff Eduardo Oban kabahin sa tinguha nga pagpada og medical team sa Pilipinas didto sa Japan.

Si Tampus nagkanayon nga lima ka doktor sa Centcom ang maglangkob sa mamahimong medical team dinhi sa nasud.

Gawas sa AFP, ang National Bureau of Investigation (NBI) mipadayag usab og kaandam pagtabang sa himuong forensic investigation sa libo-an ka mga biktima sa trahedya.

Gani gibutyag ni NBI director Magtanggol Gatdula nga pagkakarun nagpaabot nalang sila og ‘go signal’ gikan sa International Criminal Police Investigation aron mopadala og delegasyon. Gikabalak-an nga moabot og sobra 10 mil ang nangamatay sa maong trahedya sa Japan ug sa labing uwahing report misaka na ngadto sa 1,500 ang patay wala pay labot sa libo-an nga missing.   (BANAT NEWS)