354 biktima sa dengue

CEBU, Philippines -  Mikabat sa 354 ka mga kaso sa dengue ang natala sa Cebu City Health Department (CCHD) gikan sa Enero hangtod sa Pebrero ning tuiga itandi sa 329 ka kaso sa maong balatian sa susamang periodo sa miaging tuig.

Mao kini gibutyag ni Dr. Stella Ygonia sa CCHD sumala sa mga report nga nadawat nila gikan sa 80 ka barangay ning dakbayan nga nagpasabot nga misaka og 25 ang gidaghanon sa napaakan sa lamok nga dengue ning tuiga itandi sa miaging tuig.

Matud pa ni Ygonia nga pinaagi sa “action plan” report nga gipangayo nila gikan sa matag barangay, nasayran ang katibuk-ang kahimtang sa sakit nga dengue ning tuiga dinhi sa dakbayan.

Ang mga nag-unang napulo ka barangay nga adunay mga kaso sa dengue sulod sa unang duha ka buwan ning   tuiga naglangkob sa Basak San Nicolas (28), Mambaling (20), Labangon (19), Kamputhaw (17), Lahug (17), Talamban (16), Tisa (15), Duljo (14), Guadalupe (14) ug Punta Princesa (10).

Samtang gipadayon gihapon karon sa dakbayan ang house-to-house nga kampanya aron gun-ubon ang mga lugar nga maoy kasagarang itloganan sa mga lamok.

Mihimo usab og nagkadaiyang pulong-pulong ang matag barangay aron ma-edukar ang katawhan bahin sa sakit nga dengue.

Matud pa ni Ygonia nga importante kaayo ang paglimpiyo sa palibot kay mao kini ang unang pamaagi nga malikayan ang dengue.   - (BANAT NEWS)