Kolektor sa lending gitulis sa nagmotor

CEBU, Philippines - Usa ka kolektor sa lending nga kompaniya gitulis sa duha ka tulisang de motor didto sa   MC Briones street, barangay Subangdaku, dakbayan sa Mandaue sa miaging hapon.

Ang biktima mao si Bernard dela Cruz, 32 , minyo, nga taga Barrio Luz sa dakbayan sa Sugbo ug kolektor sa 1911 Enterprises sa barangay Mabolo, dakbayan sa Sugbo. Kini maoy ikatulo nga kolektor nga gibiktima sa mga tulisang de motor sa maong dakbayan.

Si SPO1 Emmanuel Enople sa kapolisan sa Presinto 2 sa Subangdaku Police Station mibutyag nga ang biktima misumbong kanila nga gi-parking niini ang iyang motorsiklo sa atubangan sa Marvin Eatery samtang nangolekta siya sa nakautang kanila sa maong lugar.

Dihang kalit lang misugat kaniya ang duha ka wala hiilhing tawo nga nagsakay usab og motorsiklo nga kolor itom ug sa pagkanaog sa usa niini, gitionan dayon siya og armas de fuego uban sa pagdeklarar nga tulis.

Dugang pa ni SPO1 Enople nga gibunlot sa mga tulisan ang belt bag sa biktima nga gisudlan sa P9,000 kapin nga iyang koleksyon ug duha ka mga cellphone ug uban pang mga importanteng dokumento nga naglakip sa iyang identification card gikan sa gitrabahoan niining kompaniya.

Si SPO1 Genaro Lambayan sa Presinto 4 sa Casuntingan Police Station sa mao gihapong dakbayan nga nahinabi sa Banat News miingon nga may pagtuo sila nga usa ra ka grupo sa mga tulisang de motor ang tigpanulis sa mga dapit sa dalan A.S. Fortuna, sa barangay Banilad ug Cabancalan ug sa barangay Subangdaku. (Romeo T. Limpangog)

Daghang informer nga napremyohan sa Capitol

Ni Chester Abadilla

Giangkon ni Gobernador Gwen Garcia nga ubay-ubay na ang mga tawong nakadawat og ganting salapi gikan sa kagamhanan sa lalawigan sa Sugbo tungod kay nakatabang sila sa pagsulbad sa mga krimen sa lalawigan.

Ang nakadawat og ganti mao kadtong mga tawo nga nakahatag og impormasyon sa kapolisan bahin sa mga kasayorang mahinungdanon nga nahimong yawe sa kasulbaran sa kasong kriminal.

Matud pa sa gobernador nga daghan na siya og naaprobahang budget nga giganti sa mga tawong misalmot sa tipster program sa kagamhanan sa lalawigan , usa sa mga epektibong programa nga gipasiugdahan sa Inter-Agencies Task Force Against Criminality(IATFAC) ubos sa iyang administrasyon.

Sumala pa ni Garcia nga ang maong programa hilom nga gipatuman kay wala pa niya ipagarpar ang paghatag og kantidad alang sa makahatag og kasayoran sa kapolisan sa probinsiya nga nagganoy ngadto sa kasulbaran sa kasong nasang-at ngadto sa kapolisan.

Gawas niini, nagpadayon usab ang programa sa Kapitolyo nga naghatag og proteksyon niadtong mga nagsilbing testigos sa mga kasong gipanid-an sa kapolisan sa lalawigan pinaagi sa Witness Protection program ug usa na niini ang kasong pagdagit ug pagpatay sa 6 anyos nga bata sa lungsod sa Minglanilla nga si Ellah Joy Pique. (BANAT NEWS)