Gisuspetsahang gun runner tiklo

CEBU, Philippines - Usa ka gidudahang gun runner nga taga dakbayan sa Sugbo nadakpan uban sa tag-as nga kalibre niining  armas didto sa barangay Lourdes, siyudad sa Bogo sa miaging gabii.

Ang suspetsado mao si Acheron Kerbi Espina Brassi, 30, ulitawo nga taga D. Jakosalem St., dakbayan sa Sugbo.

Nasakmit sa kapolisan ang iyang Ingram kansang magazine may 13 ka buhing bala, ug .45 kalibreng pistola nga may sulod nga pito usab ka bala.

Gibutyag ni PO3 Allan Dosdos, imbistigador sa Bogo City Police Office nga ang suspek unang gireklamo sa mga tindira sa Bigmac Machine sa maong lugar kay gipagawal-gawal niini sa iyang hawak ang iyang gitangkil nga pistola nga nakapahadlok sa mga customer.Nasayran sa kapolisan dihang giimbistigar ang maong suspetsado nga didto siya mag-estambay sa maong tindahan kay may uyab siyang tindera didto nga ginganlan og Stephanie Lacsamana.

Sa kabalaka sa mga kauban ni Lacsamana nga panamastamasan kini kay gihatod man sa suspetsado sa pagpauli ngadto sa ilang balay, mi-txt dayon kini sa kapolisan ug gipahibawo bahin sa pagpagawal-gawal sa suspetsado sa iyang armas nga gitangkil.

Busa milihok dayon ang kapolisan ug gisundan ang suspetsado ug dihang ila kining nakita sa balay sa iyang uyab, ila dayong gikapkapan ug didto nasakmit ang maong mga armas gikan sa lawas sa suspetsado.

Sa pagkakaron nagpahayahay na siya sa prisohan sa Bogo ug andam nang atubangon ang kasong isang-at batok kaniya.

May nadawat nga taho ang kapolisan nga usa ka gun runner ang maong suspek. (BANAT NEWS)