Koreans mireklamo Vs Boc Examiners

CEBU, Philippines - Midangop ngadto sa buhatan ni Cebu Gob. Gwendolyn Garcia ang usa ka grupo sa mga Korean nationals ug miakusar sa mga customs examiners sa tugpahanan sa Mactan Cebu International Airport nga mi-harass kanila.

Ang reklamo gikumpirmar mismo sa usa sa mga opisyal sa Bureau of Customs nga si Customs Sub-Port of Mactan OIC Collector ug Deputy Collector for Assessment Ester Nario nga nahibani sa Banat News.

Matud pa ni Nario nasurpresa siya sa dihang gipatawag ang iyang atensiyon ni Garcia sa milabay’ng petsa 9 ning bulana tungod sa giingong grupo sa mga Koreano nga mireklamo batok sa iyang mga sakop.

Ang mga Koreano mipasangil nga gi-harass sila sa mga customs personnel diha sa arrival area sa MCIA apan si Nario wala makahatag og dugang detalye kabahin sa reklamo sa maong mga langyaw.

Gikatakdang mohatag og kopya si Garcia ngadto ni Nario sa reklamo sa maong mga langyaw samtang mimando na ang gobernador kang Nario sa pagsumiter sa mga pangalan sa customs personnel nga nag-duty gikan sa bulan sa Enero ug Pebrero ning tuiga diha sa international arrival section sa MCIA. (BANAT NEWS)