CEBU, Philippines - Gibana-banang mikabat ngadto sa P1 milyon ang kantidad sa mga marijuana nga nalarot sa mga awtoridad gikan sa barangay Patong, usa ka bukirang barangay sa lungsod sa Badian niadtong Biyernes sa gabii.
Usa ka barangay tanod sa nahisgutang lugar ang nasikop atol sa operasyon tungod sa giingong pagdepensa niini sa iyang anak nga giingong maoy tag-iya sa mga tinanom nga marijuana.
Ang nasikop mao si Lucrisio Oplima samtang ang anak niini nga si Benjamin Oplima, nakaikyas atol sa pagpangronda.
Ang mga sakop sa Philippine Drug Enforcement Agency (PDEA)-7, Criminal Investigation and Detection Group (CIDG)-7 ug Philippine Air Force maoy mironda sa maong dapit human makadawat og impormasyon kabahin sa plantasyon sa marijuana sa maong dapit.
Sumala pa sa raiding teams, samtang nagtangas sila padulong sa maong lugar ilahang nasugatan si Lucrisio ug mipaila nga barangay tanod kini sa nahisgutang barangay.
Giingong gilangay-langay ni Lucrisio ang mga operatiba pinaagi sa pagtanyag og kape apan gibalibaran nila kini apan dangtan pila ka minutos usa sa mga sakop sa raiding team ang nakabantay sa anak ni Lucrisio nga si Benjamin nga nagdali-dali pagtangas sa bukid.
Si Lucrisio gikatahong miangkon ngadto sa mga awtoridad nga ang maong plantasyon sa marijuana gipanag-iya sa iyang anak nga gisugdan og tanom sa naulahi sugod pa sa milabay’ng mga buwan.
Tungod sa kadaghan ug gamay ra ang mga operatiba ilang gidauban ang 3,000 ka mga punoan ug 12,000 ka mga seedlings diha sa maong lugar ug 350 na lang ka punoan ang ilang gidala isip ebidensya.
Si Lucrisio gikatakdang pasakaan og kasong obstruction of justice samtang si Benjamin pasakaan og kasong kalapasan sa Section 16 sa Akta Republika 9165. (Brenda Batuto ug Rhia Mae Y. Booc sa The Freeman/EIM) (BANAT NEWS)