10 mil ang posibleng nakalas sa matag probinsiya

CEBU, Philippines - Gikabalak-ang moabot sa kapin 10 mil ang nakalas sa usa pa lang ka prefecture (state) sa Japan nga naigo sa 8.9 magnitude nga linog nga gisundan dayon sa 10-metros nga tsunami sumala pa sa usa ka opisyal sa maong nasud.

Kini samtang minilyon ka mga survivors ang nag-antos karon nga walay pagkaon, tubig, kuryente ug kapuy-an sa amihanang-sidlakang bahin sa Japan.

Ang gobiyerno sa Japan mipadala na og 100,000 ka sundalo sa naapektahang mga probinsya apan napanglantawang ma-triple pa ang trahedya tungod sa aksidenteng pagbuto sa usa sa mga nuclear power plant reactor ug laing usa na usab ang nagsugod og pakita og senyales nga mosunod nga moulbo.

Gikabalak-an karon sa Japan ang posibilidad nga may radiation leaks sa maong mga plantang nag-overheat nga nagbutang sa peligro sa panglawas sa tanang mga tawo sa maong mga probinsya.

Ang tigpamaba sa kapolisan sa Miyagi prefecture nga si Go Sugawara mibutyag sa Associated Press (AP) nga ang ilang opisyal mibana-banang kapin sa 10 mil ang nakalas sa ilang lugar.

Ang Miyagi adunay populasyon nga 2.3 million ug usa sa tulo ka mga dagkong prefecture sa Japan nga naigo sa katalagman niadtong Biyernes. Sa Miyagi 379 palang ka tawo ang kompirmadong patay.

Ang krisis karon sa nukleyar pabiling nagbutang sa peligro sa mga molupyo ug adunay espekulasyon nga mahimong ikaupat nga trahedya ang pagkulang karon sa pagkaon, tambal, mainom nga tubig sa mga survivors.

“First I was worried about the quake, now I'm worried about radiation. I live near the plants, so I came here to find out if I'm OK. I tested negative, but I don't know what to do next,” matud pa ni Kenji Koshiba nga usa ka construction worker kinsa midangop sa emergency center sa lungsod sa Koriyama duol sa nuclear power plant Fukushima nga miulbo.

Sumala pa sa laing mga opisyal gibanabanang 1,000 na ka tawo ang nakalas lakip na ang 200 ka mga patay’ng lawas nga nakit-an kagahapon diha kabaybayunan apan aduna pay 678 nga missing.

Aduna nay pipila ka mga nasud ang mipadala og rescue teams ug hinabang samtang duha ka aircraft carrier groups sa US ang mipaduol sa Japan aron motabang.(AP)(BANAT NEWS)