Dugang distrito tukoron sa Sugbo

CEBU, Philippines - Mas daghang distrito ang mamugna sa lalawigan sa Sugbo human unya sa gikatakda nga tigum ni Gobernador Gwendolyn Garcia ug sa mga kongresista sa lalawigan.

Tumong sa maong tigum mao ang pagtuki sa mga sugyot bahin sa pagmugna og dugang distrito gikan sa kasamtangang unom , gawas sa dakbayan sa Lapu-lapu nga nabuwag na.

Matud pa ni Kongresista Benhur Salimbangon nga dako siyang uyon nga maghimo og dugang distrito kung magkauyon silang mga kongresista nga mabuwag ang uban nilang lungsod.

Ang tibuok Sugbo adunay dul-an na sa upat ka milyon ka mga tawo ug ang balaod nagtugot nga sa matag distrito kinahanglang puy-an kini sa dili mominus 250,000 ka mga tawo.

Gawas sa mga dakbayan sa Sugbo, Mandaue ug Lapu-lapu, ang lalawigan sa Sugbo adunay populasyon nga 2.5 milyones.

Kini nagpasabot nga mahimo na nga adunay napulo ka kongresista ang lalawigan sa Sugbo. Samtang ang dakbayan sa Sugbo mahimong makadugang og usa ka distrito sanglit mikabat naman og kapin sa 750 mil ang populasyon niini. 

Misibaw karon ang tinguha nga dugangan og distrito ang Sugbo human hingusgi nga himoong buwag na usab nga distrito ang Mandaue sama sa dakbayan sa Lapu-lapu.

Si Kongresista Pablo Garcia nakaduso na og balaudnon nga magbuak sa Segundo distrito nga dunay 15 ka lungsod ngadto sa duha ka distrito. (BANAT NEWS)