CEBU, Philippines - Padayon ang hot-pursuit operation sa kapolisan batok sa tulisan nga mipusil patay sa usa ka polis trainee nga si PO1 William Mangubat Jr. kinsa miresonde sa pagpanulis diha sa sitio Mananga II sa barangay Tabunok sa dakbayan sa Talisay niadtong milabay’ng adlaw.
Nasuta nga walay giisyu nga armas kang Mangubat tungod sa rason nga gidili pa kanila nga makadala niini samtang sila nag Field Training Program pa.
Si Mangubat nakaangkon og usa ka samad pinusilan sa iyang ulo ug tuong abaga nga maoy hinungdan sa iyang kamatayon human gipusil samtang naggukod sa tulisang mitulis sa usa ka jeepney.
Adunay kaubang polis si Mangubat nga si PO1 Vhenjie Pantuan apan gumikan sa kapaspas sa hitabo wala na kini makatawag pa niini maong siya ray migukod. Ang biktima sa maong pagpanulis nga pasahero sa PUJ nagtago sa ngalan nga “Des” nga taga Deca Homes, lungsod sa Minglanilla nakuhaan sa iyang bag nga may sulod sa kuwarta, atm card, cellphone ug uban pa.
Si Mangubat giingong mikanaog sa ilawom sa tulay ug misuot-suot pagpangita sa usa sa mga tulisang nasigpatang nagbitbit og armas ug bag sa biktima apan nabugha kini sa tulisan.
Si Sr. Insp. Errol Francis Deveyra ang officer-in-charge (OIC) sa Talisay City Police Station sa pakighinabi niini sa Banat News kagahapon nagkanayon nga aduna na silay pangalan sa mga tulisan.
Matud ni Deveyra nga sa sitwasyon ni Mangubat nga walay armas tungod kay gidili pa sa mga FTP nga makabaton niini arisgado gihapon kining misunod sa tulisan.
Si Deveyra nagkanayon usab nga posibleng nawala sa huna-huna ni Mangubat ug Pantuan ang iyang pahimangno nga motawag ngadto dayon sa police station kung ugaling duna kini makaengkwentro aron dunay maka-back-up ngadto kanila.
Si Deveyra mihangyo sa mga nakakita sa hitabo ug nakadumdom sa nahimutangan sa mga suspetsado nga mohatag og mga impormasyon ngadto kanila bisan lang og paagi sa mensahe sa text. (BANAT NEWS)