Usbaw sa pletihan sa buses ipatuman na

CEBU, Philippines - Ipatuman sa mosunod nga duha ka semana ang usbaw sa pletihan sa mga bus sa lalawigan sa Sugbo human nagkauyon ang mga sakop sa Cebu Provincial Bus Operators Association kagahapon nga ilang ipatuman ang usbaw sa pletihan nga aprobado na sa Land Transportation Franchising and Regulatory Board niadto pang tuig 2008.

Sa P6 nga minimum sulod sa unang lima ka kilometro, ang LTFRB mitugot sa P1.40 nga patong matag kilometro nga mosunod apan wala kini tumana sa mga bus operators.

Atol sa gipatawag nga tigum ni Gob. Gwendolyn Garcia kagahapon, nagka-uyon nga P1.20 ang patong matag kilometro ug kuhaan pa sa 20 porsyento nga diskwento sa senior citizens ug mga tinun-an.

Aron pagseguro nga tumanon kini sa mga bus operators, usa ka kasabutan ang gikatakdang lagdaan sunod semana.

Gipasabot ni Garcia nga ang kasabutan maoy kasandigan sa mga operators sa wala nila pagpatuman sa gitugot nga pletehan sa LTFRB.

Matud pa ni LTFRB-7 regional director Ahmed Cuizon atol sa maong tigum nga mahimong kanselahon ang prangkisa sa sakyanan kung dili motuman sa lagda sa ilang buhatan.

Ang pagpirma og kasabutan gitumong usab nga mopatuman ang tanang bus operators sa usbaw sa pletihan.

Reklamo sa uban mao nga wala na’y mosakay kanila nga pasahero sanglit mamili man niadtong dunay mas ubos nga pletehan. (BANAT NEWS)