CEBU, Philippines - Miabot sa 19 ka probinsya sa Pilipinas ang naigo sa tsunami gikan sa Japan nunot sa nahitabong 8.9 magnitude nga linog sa Japan kagahapon sa udto nga mimugna og pito ka metros kon 21 ka tiil nga tsunami sa maong nasud.
Human sa pag-igo sa maong tsunami sa nagkadaiyang probinsya ug mga syudad sa Japan mipahimangno dayon ang Philippine Institute of Volcanology and Seismology kagahapon sa 19 ka probinsya sa nasud nga nag-atubang sa dagat Pasipiko ug sa Japan.
Si Phivolcs Director Renato Solidum nagkanayon sayo pa kagahapon nga ang tsunami nga moigo sa Pilipinas may gitas-ong usa ka metro moigo sa silangang bahin sa nasud alas- 5 sa hapon ngadto sa alas 7 sa gabii.
Nunot niini, gipahimangnoan ang tanang mga residente nga nagpuyo sa kabaybayunan nga biyaan una ang ilang mga balay ug moadto sa mas taas ug luwas nga mga dapit.
Ang tsunami alert giisa ngadto sa level 2 alert sa Phivolcs ug gidid-an sa Philippine Coast Guard ang mga gagmay’ng mga sakyanan sa dagat nga dili una mopalawod ug kadtong diha duol sa baybayon nga iangkorahe kini og maayo aron di mabanlas sa daplin.
Si Secretary Jesse Robredo sa Department of the Interior and Local Government nagkanayon nga ang mga tawong nagpuyo duol sa daplin sa dagat kinahanglang mobiya na dayon sa maong mga dapit.
Si Robredo sa report sa ABS-CBN News .Com ang unang bawod sa tsunami moigo sa Batanes Group gibanabanang alas 5:30 sa hapon kagahapon ug mokatay ang bawod diha sa Ilocos, ug Cagayan.
Ang maong mga probinsya nga nag-atubang sa Pasipiko nga naigo sa tsunami mao ang Batanes Group of Island, Cagayan, Ilocos Norte, Isabel, Quezon, Aurora, Camarines Norte, Camarines Sur, Albay, Catanduanes, Sorsogon, Northern Samar, Eastern Samar, Leyte, Southern Leyte, Surigao del Norte, Surigao del Sur, Davao Oriental ug Davao del Sur.
Atol sa pag-igo sa 8.9 magnitude nga linog sa Japan kagahapon nabatyagan pa ang pagtay-og ug aftershocks sulod sa 30 ka minutos apan human nga mahunong ang aftershocks nakugang nasad ang Japan dihang mibanlas ang tsunami sa pipila nila ka mga probinsya.
Kagahapon ang nagkadaiyang disaster risk management committees sa nagkadaiyang parte sa Kabisay-an ang miisa sa ilang alert level. Ang Cebu City mi-activate sa ilang rescue groups. Si Vice Mayor Agustus Joy Young mibutyag nga nangandam na ang dakbayan sa posibilidad nga pagpadala og medical team sa maong nasud ning mosunod nga mga adlaw. (EIM) (BANAT NEWS)