CEBU, Philippines - Hangtud dili nila masang-at ang kaso batok sa langyaw ug sa asawa niini nga Filipina nagdumili sa pagbutyag sa ilang mga pangalan ang kapolisan.
Ang duha gituohang may kalambigitan sa pagdagit ingon man sa pagpatay sa 6-anyos nga si Ellah Joy Pique.
Sa press conference si Sr. Supt. Patrocinio Comendador mitataw nga dili gyud nila ipagawas ang pangalan sa mga suspetsado tungod kay wala pa nila mapasaka ang kaso ug wala pa usab nila kini madakpi.
Mipasabot siya nga mahimong mohatag sila og update matag adlaw sa dagan sa ilang imbestigasyon apan mihangyong dili gyud nila ibutyag ang pangalan sa duha.
Malaumon siya nga mao gyud ang tinuod nga suspetsado tungod sa pamahayag sa mga saksi nga ilang nakit-an ang sakyanan sa wala pa gidagit ug sa dihang gidagit na si Ellah Joy Pique niadtong Pebrero 8 didto sa Calajoan.
“A lot of time to prepare the affidavit, rushing to file the case we may stumble along the way. Amo lang hinay-hinayon para segurado kaysa magdali mi nga walay klaro the public should understand,” pasabot pang Comendador.
Giawhag usab ni Comendador si Atty. Salvador Solima nga dili lang magpunay pagawas og reaksyon ngadto sa publiko ug adto nalang daugon sa korte.
Sa sayo pa si Solima miingon nga nag ‘imagine’ lang ang Task Force hinungdan nga gi-tamper ang plate number sa sakyanan nga Pajero sa iyang mga kliyente butang nga gihimakak sa kapolisan.
Matud ni Comendador sa higayon masuta sa examination nga dunay lama sa dugo ang Pajero ug motakdo sa resulta sa DNA test duna na silay cue niini alang sa pagsang-at gyud og kaso batok sa gikatahapan.
‘We are expanding our imagination? Wala na magpasabot nga we should be narrow-minded and open for possibilities,” pasabot pang Comendador sa komento ni Solima.
Matud ni Comendador nga miabot ang langyaw dinhi sa Sugbu niadtong Pebrero 2 ug milarga Pebrero 9 na.
Kagahapon sa buntag ang abogado sa pamilyang Pique nga si Atty. Daryl Amante ug si Renante Pique ug inahan niining si Ligaya mibisita sa buhatan ni Comendador. (BANAT NEWS)